Mjeku Pëllumb Pipero ka bërë daljen e parë publike që kur bëri të ditur se ishte rikuperuar nga COVID-19. Ai ka qenë i ftuar në emisionin Open ku ka bërë me dije se nuk është kuruar jashtë vendit, por ka qenë në shtëpi dhe virusin e ka kaluar me ndihmën e dy infermiereve dhe djalit. Ai ka mohuar që të ketë shkuar jashtë shtetit për kurim, përkundër zërave se kishte ikur në Turqi apo në Itali.
Pjesë nga intervista:
Pipero: Kam dëgjuar që kisha ikur në Turqi urgjent, në Itali urgjent…madje në Itali kam shkuar i intubuar. E vërteta është se jam mjekuar në shtëpi. Nuk kam lëvizur nga Shqipëria. Për fat të keq nuk kisha as bashkëshorten në shtëpi, e kisha në Itali. Kështu që e kam kaluar me dy infermiere dhe me ndihmën e djalit.
Eni Vasili: Mediat kanë shkruar, por nuk mendoni se shkak në fakt u bëtë ju vetë, u zhdukët nga media, ekranet….madje nuk u jeni përgjigjur as telefonatave, përfshirë edhe mua që ju kam marrë, thjesht për t’ju pyetur nëse jeni mirë.
Pëllumb Pipero: E kam pasur të vështirë të ruaja komunikimin me njerëzit!
Mjeku pëllumb Pipero u infektua me koronavirus një javë pasi kishte marrë dozën e parë të vaksinës pfizer në stadiumin Air Albania.
