Si rrall herë më parë Shqipëria është mbuluar nga dëbora në 95% të saj. Prej mbrëmjes së djeshme janë ulur temperaturat në disa minus grad dhe kanë mbetur të bllokuara akset kryesore në gjithë territorin.
Probleme kanë hasur drejtuesit e mjeteve edhe në akset nacionale. Për rreth 2 orë është bllokuar aksin nacional Elbasan Librazhd për shkak të rrëshqitjes së disa mjeteve pa zinxhirë, të cilat më pas e kanë bërë të pamundur ndërhyrjen e borëpastrueseve.
Gjithashtu aks problematik është dhe ai i Lezhës, ku rradhë e gjatë makinash janë bllokuar që prej ditës së djeshme, duke i lënë udhëtarët të përballen të papërgatitur me kushtet e tmerrshme atmosferike.
Dëbora ka zbardhur edhe zonat fushore dhe duket se do të mbesë e pa shkrirë edhe gjatë kësaj të diele për shkak të temperaturave tejet të ulëta.
Moti i keq ka bërë që Ministria e Arsimit të mbyllë shkollat në të gjithë vendin, duke rikthyer mësimin e online.
Lidhur me këtë situatë kritike të krijuar në vend, foli dhe meteorologia Lajda Porja në një lidhje telefonike për Ballkaëeb.
Ajo pohoi se i gjithë territori i vendit është në vlera negative të temperaturave për shkak të të ftohtit siberian, ku më shumë problematike paraqitet situata në pjesën verilindore, ku termometri shënon -12 deri në -13 gradë celsius.
“Reshjet e dëborës përfshinë gjithë territorin shqiptar. Problematike situata paraqitet në zonat lindore, verilindja, ku trashësia e dëborës është deri në 70 cm. Parashikohet që këto reshje dëbore të ketë sërish në këto zona. Do kemi spostim të reshjeve të borës vetëm në zonat veriore dhe juglindore. Pritet që kryefjala e kësaj fjale të jenë temperaturat termike. Temperaturat pritet që të kenë rënie. Vlora shënon -1 dhe Saranda 0 gradë. Në Tiranë temperaturat janë -5. Në zonat verilindore pritet që temperaturat të ulen më tej. Në disa zona termometri do të shënojë -15 gradë.”, tha Porja.
Sipas saj, dita e nesërme, megjithëse do të sjellë diell, mëngjesi do të jetë me temperatura ekstremisht të ulëta. Kjo situatë do të jetë deri në datën 23 shkurt. “Problematike në zonat malore mbeten ngricat në akset rrugore. Nga dita e hënë deri nga mesi i javës do të jenë 24 orë në vlerat negative, kjo do të bëjë që të kemi ngrirje të akseve rrugore. Ky acar pritet të qëndrojë deri në fund të javës tjetër. Do të kemi më pas afrim drejt vlerave normale të dimrit. Tirana do të ketë vlera negative mëngjeseve.”, përfundoi Porja.
