Kryeministri Edi Rama ka reaguar pas operacionit të SPAK që çoi në pranga 10 persona, mes tyre dhe gjyqtaren Enkelejda Hoxha.
Me anë të një postimi në rrjetet sociale, kyeministri paralajmëron të gjithë gjyqtarët që nuk e kanë kaluar Vetingun duhet të përgjigjen, ndërsa tha se do të ndalohen të gjithë ata që vazhdojnë të abuzojnë.
“Prangosja e gjykatëses famëkeqe të Krujës dhe rrjetit të saj kriminal nga institucionet e reja të drejtësisë, është një lajm i shumëpritur për të gjithë ne, e për të gjithë atë shumicë dërrmuese shqiptarësh, që na kanë mbështetur me zjarr për Reformën në Drejtësi!
Ky lajm duhet të inkurajojë këdo që pret drejtësi për krimet e gjykatësve e prokurorëve të korruptuar dhe uroj që çuarja e këtij llumi para drejtësisë të vazhdojë! Kush s’ka kaluar Vetingun duhet të përgjigjet, kush vazhdon të abuzojë meqë s’kalon dot Vetingun, duhet të ndalohet!”, shkruan Rama.
Kujtojmë se mëngjesin e sotëm, me urdhër të SPAK është vënë në pranga gjyqtarja e Krujës, Enkelejda Hoxha. Së bashku me të është arrestuar edhe kryesekretarja e Gjykatës së Krujës, Ela Mallkuçi dhe avokati Aldo Tabaku.
Sipas ILD-së, Hoxha ka shkelur ligjin duke ka liruar nga burgu persona të rrezikshëm.
Më 7 nëntor të vitit 2017, Enkeleida Hoxha liroi nga burgu Genci Tafilin, vëllanë e Admir Tafilit, të dy emra shumë të njohur për drejtësinë shqiptare, të akuzuar dhe dënuar për disa vepra penale.
Genc Tafili është liruar në vitin 2017 me kusht nga Gjykata e Krujës nga gjyqtarja Enkeleida Hoxha, pasi kreu 17 vite burg.
Po në nëntor të 2017-ës, gjyqtarja Enkeleida Hoxha liroi edhe Ilir Pajën nga burgu, të njohur me nofkën “UFO” nga drejtësia italiane, pasi ishte arratisur tri herë.
