Kryeministri Edi Rama e ka gjithmonë një justifikim për dështimet e tij, duke gjetur mënyrën për ta vendosur veten në pozitat e heroit dhe duke shpallur fajtorë të tjerët. Pasi priti në mënyrë të turpshme në aeroport me cermoni 1 mijë doza vaksine nga Pfizer, tashmë ai e ka gati edhe justifikimin pse vendi ynë nuk ka marrë një sasi më të madhe të vaksinave. Rama thotë se e kanë fajin kompanitë farmaceutike, që nuk i kanë prodhuar vaksiant në doza më të mëdha. Duke ushtruar sportin e tij të preferuar, të kapet fjalë për fjalë me komentuesit, Rama ka thënë vonesat në procesin e vaksinimit janë si pasojë e prodhimit të pakët nga kompania.
“Shikoni ç’ndodh në Bosnjë, do të marrin vaksinën ruse. Shikoni ç’po ndodh në Maqedoninë e Veriut që thanë se do të marrim vaksinën kineze. Ne kemi kontratën, jo ngaqë se nuk kemi lekë, por këtu është çështje sasish. Nuk ka vaksina në supermarkatet e botës që ne nuk i blemë, por ka më shumë më pak vaksina se çka kërkesa. Prandaj vonesa ishte e përgjithshme për të gjithë Evropën. Sidoqoftë erdhi një parti e parë për të mos ndaluar procesin, janë 700 mjekë dhe infermierë që çdo ditë përballen me rrezikun e vdekjes, brenda shkurtit kompania thotë se do të sjellë dhe 40 mijë të tjera që kanë dhënë garanci në kontratë. Do të vazhdojë vaksinimi dhe do të nisë me intensitet kudo, jemi ende në kohë pavarësisht vonesave që janë bërë. Kjo nga fakti se kompania po prodhon shumë pak”, tha Rama.
Është e vërtetë që shumë vende në botë nuk kanë marrë ende vaksina për shkak të shpërndarjes së padrejtë që është bërë, me vendet më të pasura që siguruan sasinë më të madhe të dozave që në fillim. Dhe kjo është e gabuar. Rama ka të drejtë kur thotë se bashkimi Europian nuk mendoi aspak për shtetet e vogla, fundja këto janë politikat e BE, burokratike dhe josolidare. Por kjo nuk e justifikon aspak dështimin e Ramës. Në asnjë shtet nuk janë dërguar vaksina në mënyrë klandestine siç ndodhi në Shqipëri. Dozat e para që erdhën në 11 janar ende nuk dihet nga kush na janë dhuruar, ndërsa erdhën më shumë për të mbuluar skandalin e qeverisë me darkën e Dubait. Edhe më e turpshme ishte ceremonia e Ramës për të pritur veç 1 mijë vaksina sikur të ishin shpëtimi nga pandemia.
Në një moment tjetër Rama mund të ndryshojë edhe diskursin e justifikimeve. Fundja pse s’kanë bukë shqiptarët?! Se nuk e prodhojnë mjaftueshëm, jo sepse janë masivisht të papunë. Aq më keq, pse janë të papunë?! Se nuk duan të punojnë përballë mundësive të shumta që i ofrohen. Natyrisht, Rama mund t’i përdorë si justifikime deri në vitin 2030, deri kur ka paralajmëruar të rrij në pushtet. Deri atëherë, shpresojmë të kemi shpëtuar të paktën nga pandemia.
