Kryeministri Edi Rama ka deklaruar se qeveria do të rishikojnë taksën e sheshtë duke e ulur me disa përqind. Sipas tij ky premtim nuk vjen për shkak të zgjedhjeve elektorle, por sepse është e nevojshme.
“Natyrisht që ne jemi të vetëdijshëm për nevojën që të bëjmë një rishikim të progresivitetit për të ardhurat personale me synimin që të jemi më të hapur ndaj nevojës së atyre që janë jo në pjesën e sipërme fare tek të ardhurat personale por në pjesën që ju prekët, por kjo do të bëhet bazuar në…e para bindjen se është koha për të bërë dhe ne e kemi këtë bindje dhe e dyta do të bëhet pa asnjë lidhje me fushatën elektorale”, deklaroi Rama.
Në konferencën e përjavshme “Ekonomia në Fokus”, Rama nuk la pa përmendur dhe kreun e PD, Lulzim Bashën. Ai e cilësoi propozimin e PD si të dobët dhe pa shtyllë kurrizore.
“Kam përshtypjen që është kohë e humbur të diskutojmë propozimet e PD-së pasi në tërësinë e vet programi i PD është si karakteri i liderit të PD, i dobët dhe pa shtyllë kurrizore, por sidoqoftë vlen në parim them që t’i përgjigjem pyetjes suaj sepse është një diskutim parimor që ndan qartësisht rrugët dhe alternativat tona. “, u shpreh ai.
Ai tha më tej se ne jemi me parimin që; ‘kush fiton më shumë, do paguajë më shumë dhe kush fiton më pak, do paguajë më pak’. “Progresiviteti ka një tjetër shtrirje mbi të ardhurat personale”, tha Rama.
Të ndodhur në prag zgjedhjesh, rishikimi i taksës progresive nuk është i vetmi premtim i dhënë. Ai gjithashtu ka premtuar se brenda muajit shkurt do të hiqet TVSH për biznesin e vogel, të cilin e vetëquajti dhe vendim histroik. Por deri më tani qeveria nuk ka bërë asnjë ndyshim dhe taksa po vijon po njësoj.
““Vijmë në këtë moment që është historik për biznesin e vogël, zero taksë, zero TVSH deri në 10 milionë Lekë të reja dhe zero taksë e TVSH vetëm nga 10-14 milionë Lekë të reja”, premtoi ai.
