Gjatë ditës së sotme është raportuar viktima e parë nga mutacioni britanik në Maqedoninë e Veriut. Ky lajm u bë i ditur në rrjetin social “Twitter” nga mjeku Goran Kungulovski. Mësohet se bëhet fjalë për persona të infektuar nga Shkupi dhe Ohri. Ndërkohë që para pak ditësh u njoftua se mutacioni i ri britanik u konfirmua tek një 46-vjeçar nga Shkupi, por që është shëruar.
Pacienti kishte bërë një test të shpejtë më 29 Dhjetor të vitit të kaluar pasi ka shfaqur simptoma të etheve ku ka rezultuar pozitiv.
Sakaq Maqedonia e Veriut gjatë 24 orëve të fundit ka regjistruar 325 raste të tjera të koronavirusit të ri (COVID-19), duke e çuar numrin e përgjithshëm të të infektuarve nga ky virus në 92.518. Sipas të dhënave nga Ministria e Shëndetësisë, në vend gjatë ditës së fundit po ashtu u regjistruan 7 viktima, me çka numri i viktimave nga ky virus është rritur në 2.848.
Numri i pacientëve të shëruar nga virusi është rritur në 81.316, përfshirë 479 pacientë të shëruar gjatë ditës së fundit. Numri i rasteve aktive aktualisht është 8.354. Autoritetet shëndetësore të Maqedonisë së Veriut gjatë 24 orëve të fundit kanë kryer 2.589 teste të dyshuara për COVID-19, duke e çuar numrin e përgjithshëm të testeve të kryera në 454.608.
