Ende nuk është marrë një vendim përfundimtar se si do zhvillohen provimet për studentët edhe pse kanë mbetur pak ditë nga nisja e sezonit. Gjithsesi Universiteti i Tiranës ka hartuar një draft që pritet ta propozojë në Komitetin Teknik të Ekspertëve, ku shihet se është menduar që provimet të mbahen online.
Rregullorja e hartuar sqaron mbajtjen e provimeve onilne, në mënyrë që në auditore të mos ketë grumbullime dhe të shmangen infektimet me virus. Sipas pikave që përcaktohen në draft, provimet që do të mbahen me gojë do të regjistrohen, ndërsa përgjigjet me shkrim regjistrohen automatikisht.
Gjithashtu rregullorja përcakton rregullat e veçanta për pedagogët, studentët dhe sekretarinë mësimore. Janë përcaktuar dy data provimesh për studentët që do të kenë probleme me internetin, probleme shëndetësore apo arsye të ndryshme që nuk mund të marrin pjesë ditën e parë të provimit. Kjo do të realizohet vetëm nëse është njoftuar paraprakisht pedagogu përkatës i lëndës.
Nga ana tjetër për rikthimin në auditore nuk ka pasur ende ndonjë lajmërim nga Ministria e Arsimit dhe Ministria e Shëndetësisë. Rregullorja e paraqitur nuk dihet ende nëse do të miratohet nga Komiteti Teknik i Ekspertëve, por ajo nuk sqaron si do të veprohet me studentët që nuk kanë pasur mundësi të ndjekin mësimin apo të hyjnë në provime për shkak të mungesës së internetit.
