Mbajtja e maskës u pa si një mënyrë për të ulur ndikimin e pandemisë tek jetët e njerëzve, por me sa duket kjo nuk është më e mjaftueshme. Nëse më parë ndiheshit të sigurt duke përdoruar vetëm një maskë, tashmë duhet ta mendoni dy herë. Ekspertët tashmë rekomandojnë përdorimin e dy maskave për mbrojtjen nga koronavirusi. Ky rekomandim ka ardhur si pasojë e shtimit të rasteve dhe qarkullimit të varianteve të reja të COVID-19 që janë zbuluar të jenë më të transmetueshme.
Shtetet në kontinetin aziatik kanë përdorur maska të një cilësie më të lartë dhe i kanë shpërndarë në të gjithë banorët e tyre, të prekur të parët nga pandemia e koronavirusit. Ndërkohë në vendet europiane dhe në Amerikë mungesa dhe shpërndarja e maskave kanë qenë një problem mjaft i madh. Vetëm pas zbulimit të variantit britanik të COVID-19, që është 70% më i transmetueshëm, qeveritë e vendeve europiane i kanë kërkuar banorëve të tyre që të përdorin maska kirurgjikale. Siç dihet, maska kirurgjikale nuk është mjaftueshëm efektive në mbrojtjen nga virusi dhe duhet të ndërrohet të paktën çdo katër orë. Zgjidhja që kanë gjetur komitetet e ekspertëve ka qenë përdorimi i dy maskave njëkohësisht, si një mënyrë më e mirë për të mbrojtuar qytetarët nga infektimi.
