Ditët në vijim Agjencia Europiane e Barnave pritet të miratojë vaksinën e kompanisë AstraZeneca. Por me sa duket Gjermania ka rekomandime të tjera për përdorimin e kësaj vaksine. Në një deklaratë zyrtare, Gjermania ka rekomanduar që vaksina e prodhuar nga AstraZeneca të mos aplikohet tek personat që janë të moshës mbi 65 vjeç. Komisioni ende nuk e ka të sigurt nëse vaksina ëështë e sigurt për kategorinë e personave që i përkasin kësaj moshe.
“Nuk është e mundur të bësh një deklaratë për efektivitetin e vaksinës AstraZeneca tek njerëzit mbi 65 vjeç.”- thuhet në deklaratë.
Prej javësh në Europë ka nisur vaksinimi ndaj COVID-19. Agjencia Europiane e Barnave për momentin ka miratuar vetëm vaksinën e prodhuar nga kompania Pfizer BionTech, dhe ende po pritet vendimi për miratimin e vaksinave të prodhuara nga kompanitë e tjera.
Nga ana tjetër Britania e Madhe e ka miratuar vaksinën e AstraYeneca që në dhjetor dhe ka qenë mbështetësja kryesore e programit. Që prej fillimit të pandemisë në në të gjithë botën janë shënuar mbi 100 milionë raste me virusin e ri që u shfaq për herë të parë në Kinë. Ndërkohë, më shumë se 2 milionë persona kanë humbur jetën në thuajse një vit që prej nëntorit të 2019-ës.
