Vlerësimin që ka për babain e bën të shpërfill komentet e ndjekësve që e quajnë babain e saj kriminel. Deputetja e Kuvendit, Reme Lala është shumë aktive në rrjetet sociale. Së fundmi ajo ka zhvilluar një bashkëbisedim me ndjekësit e saj në Instagram, ku ka marrë pyetje të shumta.
Një prej pyetjeve që vuri në vështirësi deputeten, ishte në lidhje me babain e saj, Imer Lala.
“Si ndihesh që je goca e një krimineli si Imer Lala” i ka shkruaj një ndjekëse. Ndërsa deputetja nuk ia ka kursyer përgjigjen.
“U mendova shumë në fakt që ta postoj këtë apo jo duke qenë se vajza/djali me një profil fallco më drejtohet në këtë mënyrë vendosa dhe unë t’i kthej përgjigje, meqë ke shkruar disa herë. E dashur/ i dashur, nëse të ndihmosh njerëzit, t’i hapësh derën çdokujt që ka nevojë, të jesh aty për ta kur nuk është askush, të gjendesh në ditën më të vështirë të një të panjohuri, të falësh respekt, të bën të jesh kriminel, atëherë duhet ta rikonceptojmë kuptimin e fjalëve.
Për të gjithë ata që mendojnë se mund të më intimidojnë me thashetheme dhe të tilla fjalë, jo vetëm ti që e shkruan këtë, por kushdo që e mendon, më lejoni t’ju them se veçse më shtoni vlerësimin që kam për tim atë dhe njësoj i shtohet të gjithë atyre që e njohin.
Ne jemi mësuar që koha t’i tregojë të vërtetat, ndaj koha do t’i tregojë dhe përgjigjet e pyetjeve apo komentet e këtij lloji, që për hir të së vërtetës unë kurrë nuk do t’ja bëja një vajze për babin e saj,” shkruan ajo. /Gazetareforma.com/
