Prej disa ditësh edhe në Kosovë janë rikthyer reshjet e dendura të shiut të cilat kanë shkaktuar edhe përmbytje në disa rajone të vendit. Komuna e Malishevës ka njoftuar se Lumi Mirusha ka dalë sërish nga shtrati, ndërsa dy ura janë nën ujë.
“Është rritur niveli i ujit në lumin Mirusha dhe në rrjedhat tjera të ujërave, duke shkaktuar daljen nga shtrati të lumit, kryesisht në prona bujqësore, por edhe në rrugë dhe si pasojë rruga Mirushë-Gurbardh është bllokuar, dhe vështirësi ka edhe në akset rrugore Malishevë-Kijevë, Malishevë-Banjë dhe Turjakë-Bubël, ndërsa rrugët në malet e Berishës, janë të kalueshme, pasi është larguar bora nga rrugët”, thuhet në njoftim.
Ndërkohë përmbytje janë raportuar edhe në komunën e Podujevës, të cilat kanë shkaktuar dëme ekonomike në bujqësi, infrastrukturë.Deri më tani ende nuk dihet vlera e saktë e dëmeve.
Ndërkohë kujtojmë se edhe para pak javësh vërshimet nga reshjet e dendura të shiut, kanë shkaktuar dëme të konsiderueshme materiale në zona të ndryshme të Kosovës. Pas daljes së lumenjve nga shtretërit e tyre, shumë toka bujqësore, banesa dhe rrugë u përmbytën nga reshjet e shumta të shiut. Madje prej vërshimit të shiut disa rrugë pësuan çarje të mëdha në rrugë duke i bërë ato të pakalueshme deri në riparimin e tyre.
