Maqedonia e Veriut ende nuk e ka nisur vaksinimin e qytetarëve të saj nga virusi COVID-19. Ndryshe nga Shqipëria, që është duke marrë vaksinat COVAX dhe Pfizer shteti fqinj i ka sytë nga Kina për t’i mundësuar marrjen e disa dozave të vaksinës.
Shtete të tjera në Ballkan që do të marrin vaksinën kineze janë edhe Serbia dhe Hungaria me Malin e Zi që kanë nisur kontaktet.
Ministri i Shëndetësisë Venko Filipçe ka deklaruar në një emision televiziv se qeveria ka hyrë në kontakt me dy kompanitë kineze Sinovac dhe Sinopharm për të blerë vaksinën.
Edhse pse është në pritje të vaksinave nga COVAX apo të disa vaksinave dhuratë që i janë premtuar nga Bullgaria dhe nga Serbia, mund të jetë vaksina kineze ajo që do të mbërrijë e para në Maqedoninë e Veriut.
Që prej fillimit të pandemisë në Maqedoni janë regjistruar 91161 raste me COVID-19 dhe 2812 persona kanë humbur jetën. Thuajse 80 mijë të tjerë janë rikuperuar nga virusi vdekjeprurës.
Kujtojmë që në Ballkanin Perëndimor janë shumë të pakta dozat e vaksinave që kanë mbërritur dhe procesi ka filluar në Serbi e në Shqipëri. Kryeministri Rama ka qenë kritik ndaj Europës duke thënë se kjo e fundit ka bërë diferencime dhe e ka lënë në harresë rajonin.
