Marrëdhëniet mes Greqisë dhe Turqisë duket se do të sheshohen dhe pikërisht për këtë arsye dita e nesërme do të jetë e rëndësishme për të dy shtetet.
Takimi mes kryeministrit grek, Aleksis Tsipras dhe Presidentit Turk, Recep Tayipp Erdogan, do të zhvillohet në Stamboll në kuadër të një ftese e cila ishte bërë pesë muaj më parë, gjatë takimi të tyre në Asamblenë e OKB-së.
Ky propozim ka qenë i Erdogan, në mënyrë që të diskutohen nga afër çështjet e nxehta, të cilat nuk janë të pakta mes dy vendeve, megjithatë pritshmëritë rreth takimit duket se janë të ulëta.
“Pavarësisht nga sa pritet, vlerësohet si mjaft i rëndësishëm fakti që urat e komunikimit ndërmjet të dy vendeve funksionojnë, me gjithë tensionet e vazhdueshme. Këto tensione kanë origjinë shumë të hershme, por edhe më të vonshme. Shkaku më i fundit lidhet me vendimin e drejtësisë greke për t’u dhënë azil tetë ushtarakëve turq, që u arratisën në Korrik 2016 dhe akuzohen nga Ankaraja si pjesëmarrës në tentativën për grusht shteti”, kanë thënë burime për Klan Tv
Gjithsesi, pala greke e ka marrë me shumë seriozitet udhëtimin e Kryeministrit në Stamboll. Tsipras u takua të shtunën me ambasadorin e Turqisë në Athinë dhe menjëherë më pas zhvilloi një mbledhje me ministrat kryesorë, për të shqyrtuar agjendën e bisedimeve me Presidentin Erdogan.
