Komisioni Qendror i Zgjedhjeve, (KQZ), ka zgjedhur kompaninë e cila do të bëjë identifikimin elektronik në zgjedhjet e 25 prillit. Kompania e zgjedhur është “Smartmatic” dhe do të marrë 2 miliardë lekë për të implementuar në të gjithë vendin teknologjinë që do të kryejë procesin e identifikimit biometrik.
Në njoftimin e bërë nga KQZ thuhet se kjo kompani është e vetmja, e cila ka paraqitur dokumentacionin e kërkuar nga Komisioni Qendror i Zgjedhjeve, ku edhe ka paraqitur ofertën e saj për këtë proces.
“Komisioni Qendror i Zgjedhjeve në datën 14 janar 2021, përfundoi fazën e vlerësimit të ofertës dhe zgjidhjes teknike, të paraqitur nga operatori ekonomik “Smartmatic International Hlding B.V” pjesëmarrës në procedurën prokuruese me objekt “Sisteme/pajisje të teknologjisë së informacionit për identifikimin elektronik të votuesve dhe verifikimin e tyre pas zgjedhor”.
Kompania Smartmatic International Holding B. V, brenda afateve ligjore paraqiti dokumentacionin, zgjidhjen teknike dhe ofertën ekonomike me vlerë: 19.975.774,23 USD pa T.V.SH dhe e konvertuar në lekë referuar kursit zyrtar të Bankës së Shqipërisë për datën 23.12.2020 me vlerë: 2,016,354,627.56 lekë pa TVSH.
Komisioni i Vlerësimit të Ofertave pas shqyrtimit të dokumentacionit, ofertës ekonomike dhe zgjidhjes teknike vendosi kualifikimin ofertës së paraqitur nga kompania Smartmatic International”, thuhet në njoftim. Ndërkohë, ka qenë eksperti i proceseve zgjedhore dhe ish- kryetari i KQZ, Kristaq Kume, i cili në një intervistë sqaroi mënyrën e përdorimit të teknologjisë në votime dhe se si do të bëhet identifikimi biometrik i zgjedhësve.
Ai u shpreh se votimi në zgjedhje do të bëhet në qendrat e votimit përmes përdorimit të teknologjisë, gjë që do të bëjë të mundur edhe llogaritjen e rezultatit. Ai u shpreh se çdo zgjedhës do të paraqitet në qendrën e votimit dhe do ti nënshtrohet identifikimit.
“Sa i takon identifikimit biometrik të zgjedhësve, dakordësia por edhe ajo çka është vendosur tashmë në Kodin Zgjedhor është që, ky proces të realizohet si i tillë në të gjithë territorin e vendit. Sipas asaj që është miratuar tashmë dhe KQZ ka filluar punën për ta realizuar, parashikohet që çdo zgjedhës që do të paraqitet në qendrën e votimit, kudo që të jetë kjo qendër votimi, do t’i nënshtrohet identifikimit biometrik. Përmes leximit elektronik të kartës së tij dhe po ashtu marrja e gjurmëve të gishtit për verifikimet nesër, pasnesër”, tha Kume./Gazetareforma.com/
