Moti i keq dhe reshjet e shumta të shiut edhe në Kosovë, kanë bërë që shumë zona të disa qyteteve të përmbyten.
Si pasojë e reshjeve të dendura, është bllokuar edhe rruga kryesore e hyrjes në Prishtinë. Niveli i lartë i ujit në Prishtinë dhe Drenas ka bërë që shumë biznese të bllokohen dhe mallrat të prishen.
Ndërkohë që autoritete u kanë kërkuar të gjithë drejtuesve që të përdorin si rrugë alternative aksin Magure-Lipjan për të hyrë në Prishtinë. Po ashtu edhe në disa lagje brenda Prishtinës ka patur probleme me qarkullimin e automjeteve për shkak të ujit.
Gjatë orëve të fundit në Fushë Kosovë, si pasojë e reshjeve intensive, një pjesë e lagjes Dardania është përmbytur nga uji.
Nga një video që publikohet nga mediat atje, shihet se makinat e parkuara në lagje janë të mbuluara nga uji.
Kujtojmë se edhe në Shqipëri prej ditësh situata paraqitet problematike me përmbytjet, kryesisht në veri të vendit, në Lezhë e Shkodër. Mbi 2 mijë hektarë tokë janë nën ujë, ndërsa janë shembur rrugë e ura dhe po ashtu shumë lumenj kanë dal nga shtrati.
Autoriteti Rrugor Shqiptar u ka bërë thirrje shoferëve që të mos kalojnë në akse të caktuara ku për shkak të përmbytjeve mund të rrezikohet edhe jeta./Gazetareforma.com/
