Britania e Madhe edhe pse tashmë në karantinë totale për shkak të variantit të ri të covid-19, ndodhet në alarm, pasi shifrat e viktimave dhe rasteve të reja nga covid-19, janë rritur në mënyrë drastike.
Bëhet me dije se numri i jetëve të humbura ndaj Covid-19 në Mbretërinë e Bashkuar ka shkuar në 1,041 persona në 24 orët e fundit.
Ndërkohë që është shënuar një numër rekord të infektuarish me 62,322 raste të reja të konfirmuara në vetëm 24 orë. Kujtojmë se deri më tani kjo është rritja më e lartë e vdekjeve që nga 22 Prilli i vitit të kaluar.
Si pasojë është krijuar një gjendje ankthi dhe paniku në popullatë, sidomos pas deklaratave se varianti i ri i covid-19 është më transmetues te njerëzit.
Po ashtu në shtatë ditët e kaluara 4,798 njerëz kanë vdekur nga koronavirusi, një rritje prej 32% krahasuar me javën më parë.
Kjo do të thotë që 77,346 njerëz kanë vdekur brenda 28 ditëve.
Këto shifra tragjike u konfirmuan ndërsa shefat e shërbimeve shëndetësore paralajmëruan se jemi në fazën “më serioze” të pandemisë që prej fillimit e deri më tani.
Kujtojmë se të hënën kryeministri britanik Boris Johnson tha se nuk kishte zgjidhje tjetër përveç se ta vendoste Anglinë përsëri në karantinë totale si rezultat i rritjes së rasteve dhe vdekjeve nga mutacioni i ri i covid-19./Gazetareforma.com/
