Covid vazhdon të ndryshojë përbërjen duke u shfaqur në mutacione të reja. Një i tillë është zbuluar në Afrikën e Jugut. Mjekët e vlerësojnë që të jetë më i rrezikshëm se ai që u zbulua në Mbretërinë e Bashkuar.
Britania e Madhe ka kufizuar fluturimet nga Afrika e Jugut dhe ka urdhëruar këdo që udhëton të karantinohet pas mbërritjes.
Një shkencëtar i Oxfordit ka hedhur dyshime mbi efektshmërinë e vaksinave kundër koronavirusit, përsa i përket variantit të ri të zbuluar në Afrikën e Jugut.
Studiuesit kanë thënë se mutacioni i ri transportohet më shpejt, por nuk shkakton sëmundje më të rënda.
Varianti i ri i koronavirusit, i gjetur në Britani, mund të jetë deri në 70% më ngjitës se sa i pari. Ky ka bërë që numri i rasteve dhe shtrimet në spital të rriten. Britania raportoi rreth 40,000 infeksione të reja.
Numri i vdekjeve të regjistruara ishte 744, shifra më e lartë që nga prilli.
“Me këtë rritje të infeksioneve, të shtrimeve në spital dhe shtim të numrit të njerëzve që vdesin nga koronavirusi, është absolutisht jetike që të veprojmë,” tha ministri i shëndetësisë Matt Hancock në një konferencë për mediat. “Ne thjesht nuk mund të festojmë atë lloj Krishtlindjesh që dëshirojmë të gjithë”.
Masat për kufizime të rrepta u vendosën për Londrën, Anglinë juglindore dhe Uellsin.
/Gazetareforma.com/
