Helga Vukaj, anëtare e propozuar nga Partia Demokratike në Komisionin Rregullator të KQZ-së kërkon përjashtimin e forcave Shqiponja, Shigjeta, RENEA dhe Forcave të Ndërhyrjes së Shpejtë nga garantimi i zgjedhjeve të 25 prillit dhe përgjatë periudhës së fushatës zgjedhore. Duke i lidhur këto struktura me ngjarjet e para pak ditëve, ku një efektiv i Shqiponjave i mori jetën një të riu në zonën e Laprakës në Tiranë, Vukaj tha se nuk mund të ketë garanci nga këto forca.
“Kanë precedent të rrezikshëm të cilët kanë ndikuar në perceptimin e publikut për t’i konsideruar forca të njëanshme, jo profesionale dhe për më tepër, pa integritet dhe pa proporcionalitet kur bëhet fjalë për ndërhyrjet e tyre. Ndaj, që të mos japim impaktin e ushtrimit të terrorit apo ushtrimit të presionit, mendoj që ditën e zgjedhjeve përdorimi i këtyre forcave është tërësisht i panevojshëm”, deklaroi Vukaj.
Komisioni Rregullator pranë KQZ miratoi vendimin për aktivizimin e forcave të Policisë së Shtetit në zgjedhjet parlamentare të 25 prillit. Ndonëse një trupë që ka pak muaj që është ngritur, diskutimet e projektvendimit kaluan me debate mbi aktualitetin politik.
Kërkesa e Vukajt u rrëzua nga tre anëtarët e propozuar nga mazhoranca ku krahas votës kundër, kishin edhe qëndrimin e tyre për këtë çështje.
“Personalisht, do të ishte më e rezervuar për të etiketuar struktura të posaçme të policisë”, tha Ilirjana Nano
“Absolutisht që mund të ketë raste sporadike, por nuk mund të përgjithësohen të gjithë punonjësit e Policisë apo çdo strukturë e saj”, tha Dritan Çaka.
Qëndrimet kundër në propozime nuk sollën bllokimin e aktit. Me kërkesë të komisionerëve, uniformat blu mund të futen në ambientet e qendrave të votimit dhe numërimit të votave si garanci për mbarëvajtjen e procesit zgjedhor.
Komisioni Rregullator miratoi rregullat e veprimtarisë së Policisë së Shtetit në funksion të zgjedhjeve.
Në vlerësim të rëndësisë së detyrave të Policisë së Shtetit në shërbim të zgjedhjeve, vendimi përcakton rregulla dhe detajon rolin dhe përgjegjësitë e Policisë së Shtetit dhe të administratës zgjedhore gjatë veprimtarisë së tyre në shërbim të zgjedhjeve.
Gjithashtu, përcakton rregullat dhe procedurat që duhet të ndjekë në përmbushje të detyrave të përcaktuara gjatë fushatës zgjedhore, ditën e zgjedhjeve, gjatë numërimit të votave dhe nxjerrjes së rezultatit të zgjedhjeve, në bashkërendim me administratën zgjedhore, sipas rregullave të përcaktuara në Kodin Zgjedhor.
Ndër të tjera parashikohet instruktimi dhe trajnimi i punonjësve të Policisë së Shtetit për detyrën e ngarkuar, duke i njohur edhe me dokumentacionin zgjedhor që përdoret nga administrata zgjedhore në rastet kur kërkohet ndihma e Policisë së Shtetit për vendosjen e rendit dhe të rregullit në mjediset ku kryhet administrim zgjedhor.
/Gazetareforma.com/
