Zyrtar i lartë i Organizatës Botërore të Shëndetësisë, Ëalter Riçiardi, ka bërë disa parashikime të zymta në lidhje me efektet që do të ketë pandemia në botë, ndërsa ka deklaruar se shkencës dhe njerëzve do i duhet ende kohë për ta vënë pandeminë plotësisht nën kontroll.
Zyrtari i OBSH-së, Riçiardi, në një intervistë për median greke “Zougla“, u shpreh se njerëzimit do t’i duhet ende kohë për ta mposhtur plotësisht pandeminë. Edhe pasi koronavirusi të mundet, sipas Riçiardit botës do t’i duhet ende kohë që të rekuperojë dëmet e pësuara.
“Do të na duhet edhe një vit e gjysmë për të marrë plotësisht nën kontroll pandeminë. Por, në fund të saj, njerëzimi do të jetë i dërrmuar, sikur të ketë kaluar një luftë.
Do të jetë një situatë dramatike në shumë aspekte, përfshirë edhe aspektin social dhe ekonomik. Megjithatë, njerëzimi do t’ia dalë, siç ia ka dalë përherë. Jemi ende në fillim të përballjes me pandeminë, por besoj se ashtu siç ka ndodhur edhe me HIV-in, në të ardhmen do të mësojmë edhe më tepër sa i përket koronavirusit”, ka deklaruar zyrtari i OBSH-së.
Shkencëtari italian, i cili është këshilltar special i qeverisë së Romës për çështjet e shëndetësisë, ka rrëfyer se do të duhet ende kohë për të mësuar më tepër në lidhje me sjelljen e virusit në raport me gjeografinë dhe kushtet atmosferike./Gazetareforma.com/
