Autoriteti i Konkurrencës sërish vazhdon që të jetë një institucion “memec”, kur bëhet fjalë te oligopoli që kanë vendosur katër laboratorë privatë që po zhvasin xhepat e shqiptarëve, për të fiksuar çmimin e analizës PCR (tamponit) për diagnostikimin e personave me Covid-19.
Edhe pse ligji nr. 119/2014“Për të drejtën e informimit”garanton transparencën dhe llogaridhënien e institucioneve publike për taksapaguesit shqiptarë, përfshirë normalisht edhe Autoritetin e Konkurrencës, ky institucion mbetet “gojëkyçur”.
Në ligjin e lartëpërmendur, parashikohet se Autoriteti publik trajton kërkesën për informim, duke parashtruar informacionin e kërkuar sa më shpejt që të jetë e mundur, por jo më vonë se 10 ditë pune nga dita e dorëzimit të saj.
Ligji po ashtu parashikon edhe raste kur e drejta e informimit kufizohet, mirëpo Autoriteti i Konkurrencës nuk jep asnjë feedback duke të bërë të mendosh që është inekzistent, por nga ana tjetër funksionon më së miri në një profil të ulët dhe pa zhurmë e shumë bujë.
Kujtojmë se gjatë muajit nëntor, sërish në një mënyrë flagrante, karteli biznesor (oligopoli) i katër laboratorëve privatë që ofrojnë analizën PCR (ose siç njihet testi i tamponit) për diagnostifikimin e Covid-19, njoftuan publikisht arritjen e një marrëveshjeje për uljen e çmimit nga 12 mijë lekë në 8500 lekë.
Këto katër laboratore, respektivisht kompanitë Noval Diagnostic, Spitali Amerikan, Intermedica dhe Genius, u shprehën përmes një deklarate se ky vendim është marrë për shkak të shtimit të rasteve pozitive me covid-19, por edhe si një kërkesë nga ana e Ministrisë së Shëndetesisë.
Kjo marrëveshje, e cila me anë të propagandës u shit si një “ndihmë” për publikun dhe pacientët, i ka të gjitha tiparet e shkeljes së ligjit “Për mbrojtjen e konkurrencës”.
Sipas nenit 4 të këtij ligji, në pikën a, përcaktohet se “Ndalohen të gjitha marrëveshjet, të cilat kanë si objekt ose si pasojë pengimin, kufizimin ose shtrembërimin e konkurrencës në treg, veçanërisht marrëveshjet që caktojnë, në mënyrë të drejtpërdrejtë ose të tërthortë, çmimet e blerjes ose të shitjes, apo çdo kusht tjetër tregtimi.”
Taksapaguesit shqiptarë duhet ta kuptojnë se testi i PCR-së (tamponi), po ofrohet nga një numër i kufizuar subjektesh. Po ashtu këto subjekte (laboratorë) i kanë patur çmimet e fiksuar që prej fillimit të pandemisë.
Edhe pse me një “marrëveshje” fasadë, çmimet e tamponit u ulën me rreth 30%, përsëri Shqipëria mbetet si vendi me çmimin më të lartë të testit PCR në rajon.
Duke bërë një krahazsim me valutën euro, mund të themi që nëqoftëse sot kryerja e një tamponi në laboratorët privatë kushton rreth 70 euro, në vendet fqinje ky testim kushton midis vleftës 40 deri në 60 euro.
Për ta risjellë në memorien e lexuesve, Autoriteti i Konkurrencës gjatë muajit tetor gjobiti 24 kompani farmaceutike të tregtimit me shumicë dhe pakicë të materialeve paramjekësore, ku përfshiheshin edhe rritja me marrëveshje e të gjitha subjekteve njëkohësisht të çmimeve të dezinfektantëve, maskave dhe dorezave.
Mesa duket kjo lëvizje e Autoritetit të Konkurrencës ishte sa “për të thënë” që u çua nga “gjumi letargjik”, sepse nuk është se solli një ndryshim real në xhepat e pacientëve shqiptarë me covid-19.
Kujtojmë se vlera totale e gjobave të 24 kompanive farmaceutike, ishte 34 milionë lekë, ose rreth 280 mijë euro./Gazetareforma.com/
