Edhe mbrëmja e së premtes u mbyll me trazira, dhunë policore, arrestime, gaz lotsjellës, rrahje dhe shumë zemërim nga të rinjtë që janë zotuar për të organizuar sot një protestë edhe më të fuqishme se ajo e ditëve të fundit.
Por fotoja e të riut që i shpëtoi policisë pasi shokët e tij ua hoqën nga duart efektivëve që u gjendën të befasuar nga sulmi i tyre në qendër të Tiranës, po bën xhiron e rrjetit dhe mund të quhet fare mirë edhe fotoja simbol e kësaj dite.
I riu që shokët e shpëtuan nga prangat e policisë, ndërsa e kishin mbërthyer në zonën e ish-Bllokut, ka gjetur kohën të pozojë pikërisht me prangat që i ka akoma në njërën dorë.
Policia shpërndau me ujë dhe gaz lotsjellës protestuesit e mbledhur para kryeministrisë dhe ata u zhvendosën në zona të tjera. Po ashtu kanë nisur arrestime nga policia.
Tubimi dje nisi me thirrjet “Poshtë Diktatura” dhe “Rama, ik”. Protestuesit kërkuan reformimin e forcave të rendit dhe largimin e Drejtorit të Përgjithshëm të Policisë së Shtetit, Ardi Veliu.
Por burime nga Policia e Shtetit, i thanë dje “Gazetës Reforma” se Drejtori i Përgjithshëm Veliu, jo vetëm që nuk ka ndërmend të japë dorëheqjen, “por është zotuar para kryeministrit Rama se, do të shpërndante protestuesit me çdo mjet dhe do ta vërë sërish në fundjavë situatën në qetësi duke spastruar rrugët e Tiranës”.
/GazetaReforma.com/
