Ç’po ndodh me kandidatët e “FBI”-së shqiptare? Qeveria shtyn krijimin e Byrosë Kombëtare të Hetimit (BKH) pas zgjedhjeve, megjithë këmbënguljen e Ambasadës së SHBA që ky proces të bëhet sa më shpejt. ShBA është partnere për ngritjen dhe trajnimin e BKH-së.
Në pakt të heshtur, edhe opozita nuk ka kundërshtuar zvarritjen. Qëllimi është që BKH të mos merret me hetimin e shkeljeve në zgjedhje. Për këtë qëllim në Komisionin e Ligjeve është dërguar nga SPAK dhe Prokuroria e Përgjithshme ndryshimi i projektligjit që ishte rënë dakord me PD-në në Këshillin Politik. Sipas ndryshimit të propozuar, SPAK dhe BKH nuk do të hetojnë krimet zgjedhore dhe nuk do të raportojnë në KQZ për këto nene.
Vonesa
Shtyrja është e paralajmëruar. Zgjedhja e kreu të BKH u bë 6 muaj me vonesë nga Këshilli i lartë i Prokurorisë. Ish- zv.drejtoresha e Policisë së Shtetit, Aida Hajnaj, u vendos në këtë post në 30 korrik dhe pas kësaj nisi procedura për konkursin e kandidatëve për në BKH.
Ambasada e SHBA do ta uronte Hajnajn si Drejtoreshën e parë të Byrosë Kombëtare të Hetimit (BKH). Kjo është një piketë historike në zbatimin e Reformës në Drejtësi, deklaronte ambasada.
“BKH do të trajnohet nga FBI-ja amerikane dhe tani do të fillojë rekrutimin e hetuesve të nevojshëm për të siguruar suksesin e SPAK”, theksonte deklarata.
Konkursi
Procesi i deklarimit të formularëve të pasurisë për 35 kandidatët e kualifikuar si agjentë të Byrosë Kombëtare të Hetimit, është përmbyllur ditën e sotme.
Deklaratat janë dorëzuar nga kandidatët me e-mail komisionit të Byrosë Kombëtarë të Hetimit. Anëtarët e komisionit do të verifikojnë pasuritë e tyre dhe të familjarëve të tyre. Disa prej kandidatëve nuk i kanë plotësuar sipas ligjit deklaratat e pasurisë. Pas përfundimit të këtij procesi të kualifikuarit, kandidatët do t’i nënshtrohen testit të poligrafit, që do bëhet nga anëtarë të SHÇBA, kreu i SPAK-ut dhe anëtarët e komisionit.
Kandidatët kanë dorëzuar deklaratat me e-mail komisionit të BKH-së, ku kjo e fundit do të verifikojë pasuritë personale dhe të familjarëve të tyre.
Ky proes mund të zgjatet pa problem nga qeveria, sepse varet nga kthimi i përgjigjeve të ILDKPI-së, DSIK-së, SHÇBA-së, Tatimeve, Hipotekave, SHISH-it.
Pas përfundimit të këtij procesi të kualifikuarit do t’i nënshtrohen testit të poligrafit, që do bëhet nga anëtarë të SHÇBA-së, kreu i SPAK-ut dhe anëtarët e komisionit. Ndërkohë, për vakancat për plotësimin e 60 hetuesve të BKH-së, gara pritet që të rihapet sërish në fillim të vitit 2021.
Fillimisht ishin 39 aplikantë që kaluan në fazën e katërt të garës për hetues në BKH që është pikërisht deklarimi i pasurisë, por vetëm 35 prej tyre kanë dorëzuar formularin.
Faza tjetër e garës për BKH do të jetë testi i poligrafit ku ora dhe data do të njoftohen më datë 2 dhjetor.
Nga 403 kandidatë testin fizik e kanë kaluar vetëm 103, ndërsa 300 të tjerë nuk janë kualifikuar në garën për hetues të BKH-së. Kandidatët e kualifikuar, në datën 26.10.2020 iu nënshtruan testit të esesë me shkrim dhe testi logjik. Testimi i Aftësive fizike u zhvillua nën vëzhgimin dhe monitorimit e Komisionit Ndërkombëtar të Ekspertëve, të caktuar nga misionet e Qeverisë së Shteteve të Bashkuara të Amerikës dhe Bashkimit Europian në Shqipëri.
Ata që do të fitojnë në fund do të trajnohen tre muaj në akademinë e FBI-së në SHBA.
/GazetaReforma.com/
