Pandemia e koronavirusit dhe karantina e zgjatur e pranverës, por edhe kufizimet e hyrje-daljeve me vendet e BE-së, bënë që këtë vit turizmi shqiptar të kishte rezultatet më të dobëta ndër vite.
Kufizimet për shkak të COVID-19, bënë që Shqipëria të kishte një përgjysmim të të ardhurave që u siguruan nga turizmi në krahasim me vitin e kaluar.
Të dhënat e përpunuara që janë publikuar nga Instituti i Statistikave përmes Anketës së Turizmit “Strukturat Akomoduese”, në 3-mujorin e tretë të vitit, tregojnë se numri i vizitorëve në këto struktura gjithsej është ulur me 43,3%, në krahasim me të njejtën periudhë të vitit 2019.
E njëjta tendencë me ulje është shfaqur edhe për net-qëndrimet, tregues që është ulur me 44,9%, në krahasim me 3-mujorin e tretë të vitit 2019.
Anketa e INSTAT-it ka analizuar edhe preferencat e turistëve gjatë këtij viti, ku në raportin mes bregdetit dhe malit, dominoi i pari, pasi 79% e tyre zgjodhën plazhet duke qenë edhe verë.
Po ashtu nga anketa del se Jugu i vendit dghe Riviera, mbetën rajonet më të vizituara, ku 42.1% e net-qëndrimeve në këtë 3-mujor ishte pikërisht në këtë rajon.
Sa shpenzuan shqiptarët
Këtë verë pjesa dërrmuese e pushuesve shqiptarë ishin të detyruar prej situatës së Covid-it që të kalonin në vend pushimet e verës.
Por gjithsesi sasia e parave që ata shpenzuan apo net-qëndrimet në hotele, nuk e mbushën dot disniveli që u krijua nga mungesa e turistëve të huaj.
INSTAT ka vlerësuar se nëse do të analizojmë sjelljen e vizitorëve rezident nga net-qëndrimet, vërehet se vizitorët rezidentë shqiptarë preferuan të pushojnë gjatë muajve korrik, gusht dhe shtator në rajonin e Jugut.
Ata shpenzuar 5,3% net-qëndrime më shumë, në zonat bregdetare, duke shpenzuar 10,7% net-qëndrimi më shumë, krahasuar me të njëjtën periudhë të vitit të mëparshëm.
Nga ana tjetër, Veriu mori dhe goditjen më të madhe me një rënie të net-qëndrimeve me mbi 50%. Efekti negativ në frekuentimin e Veriut ndihet edhe për faktin që, përfshin disa prej pikave më interesante malore dhe që zakonisht frekuentoheshin nga të huajt, që për këtë sezon nuk mundën të vinin.
Çekët, polaket, gjermanët apo dhe grupe të tjera të organizuara, ndër vite kanë qenë ndër vizitorët më të mëdhenj të Veriut kryesisht të Thethit dhe të Valbonës.
Rënia e vizitorëve
INSTAT vlerëson se gjatë 3-mujorit të tretë 2020 është shënuar rënie e numrit të vizitorëve, ku numri i vizitorëve rezident është ulur me 9,2%, në krahasim me 3-mujorin e tretë 2019, ndërsa numri i vizitorëve jo-rezidentë është ulur me 59,3%, në krahasim me 3-mujorin e tretë 2019.
Nëse do të analizojmë vizitorët rezidentë sipas rajonit, afërsinë me bregdetin dhe llojin e strukturave akomoduese, treguesi që nuk ndjek këtë ecuri është numri i vizitorëve rezidentë, të cilët kanë pushuar në Rajonin e Jugut duke u rritur me 0,4%. “Në Zonat Bregdetare është shënuar rritje me 25,7%, krahasuar me të njëjtën periudhë të vitit të mëparshëm”,- thuhet në anketë.
“Normat neto të shfrytëzimit, të dhomave dhe të shtretërve, janë dy tregues të cilët masin përqindjen e shfrytëzimit të kapaciteteve akomoduese, dhoma e shtretër të disponueshëm për vizitorë.
Gjatë këtij 3-mujori, norma e shfrytëzimit të dhomave të “Hoteleve dhe akomodimeve të ngjashme” është 19,2%, kundrejt 38,2% që ishte në 3-mujorin e tretë 2019. Norma e shfrytëzimit të shtretërve të “Hoteleve dhe akomodimeve të ngjashme” është 18,4%, kundrejt 43,4% që ishte në tremujorin e tretë 2019, thuhet në publikimin e INSTAT.
/Burimi: INSTAT/ GazetaReforma.com/
