Pas deklaratave provokuese të presidentit serb, Aleksandar Vuçiç për Kosovën, të cilën e krahasoi me konfliktin si në Nagorno-Karabak dhe duke theksuar se konflikti mund të përshkallëzohet, ka reaguar edhe NATO.
Presidenti serb tha ditën e enjte se zgjidhja më e mirë e mundshme mes Kosovës dhe Serbisë, është dialogu, pasi në të kundërt sipas tij, mund të ndodhi një konflikt i përshkallëzuar si në Nagorno-Karabak.
Selia Ushtarake e NATO-s, ka deklaruar se misioni i KFOR-it [në Kosovë], i udhëhequr nga NATO-ja, mbetet plotësisht i përqendruar në zbatimin e mandatit nga Kombet e Bashkuara, për të ofruar siguri dhe liri të lëvizjes për të gjitha komunitetet në Kosovë.
Media e njohur ndërkombëtare, Radio Evropa e Lirë (REL), i ka pyetur zyrtarët e NATO-s, në lidhje me se si e shihnin ata krahasimin e përdorur qëllimisht nga Vuçiç midis Kosovës dhe Nagorno Karabakut.
“Ne vazhdojmë të mbështesim dialogun midis Beogradit dhe Prishtinës, me ndihmën e BE-së, si zgjidhje të vetme të përhershme politike për stabilitetin në Kosovë dhe në rajonin e gjerë të Ballkanit Perëndimor”, ka thënë një zyrtar i NATO-s në një përgjigje me shkrim për Radion Evropa e Lirë (REL).
Deklarata provokuese e Vuçiç, nxiti reagime të ashpra nga autoritetet e Kosovës.
Ushtruesja e detyrës së presidentit, Vjosa Osmani, deklaroi se pret që NATO dhe BE të reagojnë ndaj “kërcënimit” të presidentit serb, në lidhje me deklaratën e tij për një konflikt dhe luftë të dhunshme me Kosovën në rast të dështimit të dialogut mes dy palëvëe.
Ndërkohë edhe kryeministri kosovar, Avdullah Hoti është shprehur se deklarimet e presidentit të Serbisë nuk janë në dobi të normalizimit të marrëdhënieve midis dy vendeve.
Konflikti në Nagorno Karabak
Një nga vatrat aktive të konfliktit në Evropë për momentin, është konflikti midis Azerbajxhanit dhe Armenisë për rajonin e Nagorno Karabakut.
Konflikti për kontrollin e këtij rajoni kanë nisur që më 27 shtator, edhe pse gjatë kësaj jave është shpallur një marrëveshje armëpushimi.
Karabaku njihet ndërkombëtarisht si pjesë e Azerbajxhanit, por qeveriset nga armenët etnikë, me mbështetjen e Qeverisë armene.
Kujtojmë se po për të njëjtin rajon, ka patur një konflikt mes dy vendeve edhe gjatë vitit 1994, k uu ndërmor një armëpushim, por pa marrëveshje të paqes.
“Konflikti në Nagorno Karabak ka treguar shembullin e një konflikti të ngrirë, por kur dikush e shkrin atë, mund të përshkallëzojë në një katastrofë të vërtetë”, ka provokuar me deklaratën e tij politike për Kosovës, presidenti Vuçiç ditën e djeshme./GazetaReforma.com/
