Protesta e banorëve të Astirit ndodhet në ditën e saj të 80-ë dhe mesa duket policia është duke përdorur të gjitha mënyrat për t’i shpërndarë.
Mësohet se ditën e sotme forcat e policisë kanë arrestuar Besnik Doçin, një nga protestuesit kundër ndërtimit të Unazës së Re, ku sipas projektit shtëpia e tij do të shkatërrohej pa asnjë dëmshpërblim.
Doçi ka qenë duke lyer shtëpinë në momentin që forcat e Komisariatit Nr.2 e kanë arrestuar nën arsyetimin e “ndërtimit pa leje”.
Një arsye kjo thuajse e papranueshme, sidomos për banorët që kanë tashmë thuajse tre muaj që protestojnë çdo ditë në rrugën kryesore para shtëpive të tyre. Kështu të mbledhur të gjithë bashkë si çdo mbrëmje ata kanë vendosur të marshojnë drejt Komisariatit nr.2 për të mbështetur Doçin, por edhe për të kërkuar lirimin e tij.
Të gjithë banorët thonë njëzëri se nuk do të largohen që aty deri në momentin që bashkëvuajtësi i tyre nuk del nga vendi ku është duke u mbajtur.
