Pas disa ndryshimeve dhe emërimeve të reja në kabinetin e Presidentit të Republikës, duket se radha për lëvizje nga detyra i ka ardhur edhe këshilltarit të tij për Sigurinë Kombëtare, ish-kreut të SHISH-it, Bahri Shaqiri.
Presidenti Meta ka postuar përmes fotove takimin e fundit në Presidencë me Shaqirin, i cili sot njoftoi dorëheqjen nga posti i këshilltarit të Presidentit për çështjet e Sigurisë Kombëtare.
Ende nuk ka asnjë njoftim zyrtar për motivet e largimit të Shaqirit nga kjo detyrë, por burime nga Presidenca aludojnë për një “ftohje të marrëdhënieve” mes tij dhe kreut të shtetit.
Por vet Presidenti Meta, e ka vlerësuar figurën dhe kontributin e Shaqirit, duke e shprehur atë edhe nëpërmjet një statusi zyrtar në Facebook, ku shkruante se “do të vijojë ecjet me të nga liqeni”.
Ja postimi i plotë i Presidentit Ilir Meta:
“Kënaqësi të bashkëpunoja me z.Bahri Shaqiri, për më shumë se tre vite, në detyrën e Këshilltarit për Çështjet e Sigurisë Kombëtare.
Gjithmonë korrekt, luajal, profesional dhe atdhetar.
E pranova dorëheqjen e tij duke i uruar suksese për të ardhmen.
Do të na mungojë këtu në Institucion, por shpresoj që me Arin, do vazhdojmë të dalim për ecje nga liqeni”.
Kujtojmë se sot më herët Presidenti Ilir Meta liroi nga detyra Shefin e tij të Kabinetit, Drejtorin Arben Cici, duke e zëvendësuar atë me mikun e tij Edmond Haxhinasto, ish-ministër i Bujqësisë.
/GazetaReforma.com/
