Kombëtarja jonë ka filluar grumbullimin për tre ndeshjet e nëntorit që pritet të jenë me shumë emocion pasi luajmë përballë Kosovës në një ndeshje “vllazërore” dhe më pas përballë Bjellorusisë dhe Kazakistanit për kualifikueset e Ligës së Kombeve.
Më 11 nëntor kuqezinjtë e Rejës përballen në një ndeshje miqësore me dardanët e Challandes të cilët njësoj si ne vijnë me shumë mungesa këtë nëntor.
Kombëtares tonë do t’i mungojnë lojtarë kyç të ekipit, por kurrsesi nuk mund të mungojë kapiteni Elseid Hysaj i cili e kishte në dyshim grumbullimin për shkak të rasteve pozitive me koronavirus në Itali. Por më në fund gjendja te Napoli është qetësuar dhe Hysaj është nisur për në Shqipëri.
Lajmin e kthimit në kombëtare e ka dhënë vetë Hysaj përmes një fotoje të postuar në Instagram. Mbrojtësi ka postuar foton e pasaportës shqiptare dhe e ka shoqëruar me simbole, teksa nga sfondi minimal pas saj mund të kuptojmë se është në ambientet e një aeroporti.
Lajm i madh për trajnerin Reja, që pas Gjasulës konfirmon një tjetër senator për ndeshjet e Ligës së Kombeve, ndërkohë në dyshim janë ende disa lojtarë./Iconstyle.al/
