Një tjetër rast dhune brenda familjes është shënuar sot, këtë herë në qytetin e Kurbinit, por ndryshe nga shumë raste, viktima është një burrë.
Nga sa mësohet, i sulmuari është kryefamiljari i një familjeje kurbinase, i cili pas një debati që degjeneroi në konflikt me bashkëshorten, mbeti viktimë e sulmit të kësaj të fundit.
Sipas policisë, gruaja “e guximshme” e ka goditur me sqepar në kokë bashkëshortin e saj, pas një konflikti në Kurbin në orët e para të mëngjesit të sotëm.
Burri është dërguar në gjendje të rëndë në spital pasi ka marrë plagë të thella në kokë.
Nga sa mësohet, çifti ka pasur herë pas here konflikte të vazhdueshme, teksa kanë dhe disa fëmijë. Në zonën ku ata banojnë në Kurbin, ata njihen si persona konfliktualë.
Nga ana tjetër, pavarësisht këtyre informacioneve, në Polici nuk ka pasur asnjë denoncim nga gruaja apo burri për dhunë në familje.
Nga ngjarja në Kurbin, mësohet se gruaja quhet Drane Deda, 58 vjeçe, dhe goditi me sqepar në kokë bashkëshortin e saj, Llesh Deda, 61 vjeç. Çifti mësohet se kishin plot 10 fëmijë dhe ngjarja ka ndodhur në 3 të mëngjesit në sy të tyre.
Llesh Deda u dërgua në spitalin e Traumës në Tiranë, pasi ka marrë plagë të rëndë në kokë. Saktësisht ngjarja ndodhi në fshatin Sanxhak të Kurbinit, teksa çifti njihen si persona konfliktualë në fshat edhe pse ata nuk kishin bërë asnjë denoncim për njëri-tjetrin në komisariat.
/GazetaReforma.com/
