Donald Trump ka bërë avantazhe në disa shtete, ndërsa numërimi i votave ka vijuar me ritme të ngadalta. Kështu rezultati i zgjedhjeve amerikane për postin e presidentit bëhet më i paqartë, pasi avantazhi i Biden në shtetin e Arizonës ka pësuar ulje, ndonëse ai mori fitoren në xhep në shtete kyçe (si Wisconsin dhe Michigan) për të cilat Trump tha se do nisë procese gjyqësore për të përmbysur rezultatin, me pretendimin se janë vjedhur zgjedhjet.
Një tjetër arsye se përse Biden e sheh vijën e finishit, por nuk e prek dot atë është vonesa në numërimin e votave në shtetet e fundit të mbetura, shoqëruar me disa ndryshime të papritura. Këto vonesa dhe ndryshime janë në Arizona, Nevada, Pensilvani, Georgi, Carolinë të veriut. Rezultatet aktualisht, mbeten me 264 për Biden (nga 270 që i duhen për të fituar) dhe 214 për Trump.
Në Arizona Trump ka rikuperuar shumë, madje pritet të ketë më shumë përparime në vazhdim. Drejtimi i Biden tani ka rënë në 69,000 vota, nga një total prej 2.8 milion. Në Nevada numërimi vazhdon, por zyra zgjedhore shtetërore nuk ka dhënë ndonjë azhurnim për gati 24 orë. Me 14% të votave të humbura, Biden kryeson me 7,500 vota. Nevada ka 6 vota të cilat më herët u konsideruan si vendimtare pasi mund t’i jepnin atij fitoren, por procesi i numërimit u ngadalësua.
Pensilvania është shteti ku numërimi vijon më ngadalë nga të gjitha vendet e tjera që kanë mbetur. Disavantazhi i Trump është zvogëluar jashtëzakonisht shumë kurse nga ana tjetër rezultatet në Carolinën e Veriut mund të mbërrijnë brenda një jave, për shkak të ligjit zgjedhor në fuqi në këtë shtet. Sakaq edhe Xhorxhia ka pothuajse të njëjtin nivel numërimi votash: 23 mijë vota nga 4.8 milionë.
/GazetaReforma.com/
