Policia e Tiranës ka bërë me dije se ka parandaluar një ngjarje të rëndë disa orë më parë, ku një 30-vjeçar tentoi të vrasë gruan e tij me automatik, në sy të fëmijës së tyre të vogël.
Pas dhunimeve të shpeshta që 30-vjeçari Renato Elezi i bënte bashkëshortes së tij dhe pasi mësoi që gruaja e tij kishte kërkuar urdhër mbrojtjeje nga ai, Elezi i ka drejtuar automatikun në kokë, por fatmirësisht nuk e ka shkrepur, duke shmangur një tragjedi.
Pas njoftimit të policisë, forcat e rendit kanë ndërhyrë në kohë për të shmangur ndoshta edhe një ngjarje si ajo e Elbasanit, ku 71 vjeçari Lefter Zhidru pas një sherri me gruan mori kallashnikovin dhe qëlloi mbi policinë dhe qytetarët, por më pas u ekzekutua nga Forcat Renea.
Njoftimi i Policisë:
Shërbimet e Komisariatit të Policisë Nr. 1, pas njoftimit të marrë se në rrugën “Asdreni”, një 30-vjeçar kishte konflikt me bashkëshorten dhe mbante armë zjarri në ambientet e banesës së tyre, kanë shkuar menjëherë në adresën e dhënë duke parandaluar përshkallëzimin e dhunës në familje.
Gjatë kontrollit të ushtruar në këtë banesë u gjet dhe u sekuestrua në cilësinë e provës materiale një armë zjarri kallashnikov, me një krehër me 22 fishekë.
Në përfundim të veprimeve u bë arrestimi në flagrancë i shtetasit R. E., 30 vjeç dhe materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme./GazetaReforma.com/
