Kryeredaktori i gazetës javore vjeneze Falter, Florian Klenk, ka treguar se një prej autorëve të sulmit terrorist që ndodhi mbrëmjen e djeshme në qendër të Vjenës, është shqiptar.
Gazetari Klenk ka treguar se terroristi shqiptar me origjinë nga Maqedonia e Veriut quhet Kurtin S.
Sipas informacionit të gazetarit, bëhet me dije se i riu me origjinë ka lindur në vitin 2000 dhe ka qenë i skeduar si person i radikalizuar.
Ndërkohë me anë të një postimi në tëitter, gazetari i javores Falter, ka shkruar se shqiptari është ndaluar në korrik të këtij viti të shkonte në Siri për luftë, dhe se bën pjesë në grupin e 90 austriakëve të radikalizuar.
“Kam zbuluar disa detaje rreth terroristit. Emri i tij është Kurtin S., i lindur në 2000, ishte 20 vjeç, u lind dhe u rrit në Vjenë. Ai ka origjinë shqiptare. Prindërit e tij vijnë nga Maqedonia e Veriut dhe nuk bien në sy kur bëhet fjalë për Islamizmin.
Ai ishte në objektivin e Zyrës për Mbrojtjen e Kushtetutës sepse ishte një nga rreth 90 islamikë austriakë që donin të udhëtonin në Siri. U ndalua në korrik. Policia nuk e besoi që po planifikonte një sulm terrorist në Vjenë”, ka shkruar gazetari austriak.
Kujtojmë se nga sulmi terrorist mbrëmjen e djeshme në Vjenë, u vranë katër persona dhe u plagosën 15 të tjerë.
Mësohet se tre prej viktimave janë banorë të Vjenës, 2 burra dhe një grua, ndërsa i katërti është autori i sulmit. Ministri i Brendshëm i Austrisë, Karl Nehammer, ka thënë se sulmi i mbrëmshëm ka qenë padyshim terrorist dhe se autori ishte mbështetës i Shtetit Islamik.
Ndërkohë në konferencën e jashtëzakonshme për shtyp, shefi i Policisë është pyetur nëse agresori ishte vetëm një. Drejtori i Policisë austriake ka theksuar se bazuar nga hetimet, ka dalë se autorët janë më shumë dhe kërkimet për ta po vazhdojnë. Të shtënat me armë njëkohësisht në gjashtë pika të ndryshme të Vjenës kanë treguar në fakt se autorët e sulmit terrorist kanë qenë të shumtë dhe të koordinuar me njëri-tjetrin./GazetaReforma.com/
