Presidenti aktual i SHBA dhe kandidati për një mandat të dytë, Donald Trump gjatë një tubimi të mbajtur në Nebraska ka folur për nominimin për çmimin Nobel dhe për ndërmjetësimin e SHBA-së për dialogun Kosovë-Serbi.
Gjatë fjalimit të tij, Trum tha se ka ndalur luftën 400 vjeçare mes të dyja vendeve dhe se të dyja palët, para dy muajve ishin në zyrën e tij duke puthur e përqafuar njëri-tjetrin.
“Unë jam nominuar për tri çmime Nobel, a mund ta besoni, dhe kjo për rajone të ndryshme, sikurse mes Kosovës dhe Serbisë, jemi duke bërë marrëveshje tregtare. Ata ishin duke e luftuar dhe duke e vrarë njëri-tjetrin për shumë dekada. Më pas thash, tregojuni që ne nuk do të bëjmë asnjë biznes me ta, ata e duan biznesin tonë, ne nuk do të bëjmë asnjë biznes deri sa ata të ndalen së mbyturi njëri-tjetrin. Dhe e dini çfarë, u deshën vetëm 20 minuta për të bërë marrëveshje! Mendoj që ata po luftonin që 400 vjet, ishin duke luftuar për shumë kohë. Para dy muajve ata ishin në zyrën time, duke përqafuar e puthur njëri-tjetrin”, ka thënë ai.
Ndërkohë kujtojmë se më 4 shtator Kosova dhe Serbia nënshkruan në Uashington për një bashkëpunim ekonomik, ndërsa lanë pezull çështjen e normalizimit politik.
