Në median sociale janë bërë virale replikat e kryeministrit Rama me një qytetar lidhur me borxhin publik. Rama e krahason borxhin tonë me atë të Japonisë, ndërsa qytetari i përgjigjet: Unë them t’i japim ne borxh Japonisë.
Duke komentuar mbi postimin e kryeministrit, qytetari i shkruan fillimisht Ramës se borxhi ka shkuar 81.4 përqind. “Në 100 mijë lekë që kemi në xhep, vetëm 19 mijë janë tonat. 81 mijë i kemi borxh,” shkruan ai.
Rama i përgjigjet se Japonia e ka borxhin 130 përqind. Përgjigja e papritur e qytetarit shkaktuar humor në rrjetet sociale: “Unë them t’i japim ‘ne’ borxh Japonisë nga ato 19 mijë që na kanë ngelur”, shkruan ai.
Kryeministri Edi Rama është munduar këto ditë të sqarojë publikun për borxhin publik, pasi opozita e akuzon se e ka çuar në nivele shumë të larta. Përmes një postimi në rrjetet sociale, Rama bën krahasimin në vite dhe justifikon rritjen e borxhit me rritjen e investimeve që janë bërë.
“…dhe meqë dëgjoni llafe shumë për Borxhin Publik nga ata që e zhytën Shqipërinë në borxhe ndaj sipërmarrjes, shëndetësi, arsim e deri edhe ndaj personave me aftësi të kufizuar, të prekurve nga përmbytjet, e madje edhe bebeve të porsalindura që i lanë pa mikrobonusin 5 mijë Lekë, njësoj si rrugët e lëna rrugëve, me këtë krahasim fare të thjeshtë për ta kuptuar dallimin e madh mes tyre e nesh, ju uroj një ditë të mbarë”,- shkruante Rama para disa ditësh.
Ndërsa replika me qytetarin ndodhi pas një postimi ku tregohej investimi tek mbikalimi i Kalimashit.
/GazetaReforma.com/
