Ato sot i kanë bërë thirrje kryeministrit Rama, por kanë kërkuar llogari edhe për mungesën e ministrit Ahmetaj, apo deputetit Erion Braçe, për të cilin thonë se, i mbushi me gënjeshtra.
Të revoltuara, gratë naftëtare të uzinës së Ballshit që janë futur në grevë urie, për të zëvendësuar punonjësit meshkuj, vunë në dukje braktisjen nga qeveria, pa u dhënë asnjë zgjidhje për pagat e prapambetura.
Por sot në mjediset e grevës së urisë kanë shkuar përfaqësueset e Partisë Demokratike, ish-deputetet Dhurata Çupi dhe Orjola Pampuri, të cilat panë nga afër gjendjen e grave greviste të uzinës së Ballshit.
“Të mbushet xhepi i Arben Ahmetaj dhe i Erjon Braçes dhe Edi Ramës. Paga ime është kacidhe para lekëve që marrin ata. Edi Rama na premtoi se “ari i zi” do të kalojë në Uzinë dhe lekët e prapambetura punëtorët do t’i marrin. Ku është Beso Sulaj? Heshtin. Gropa e zezë nuk është Uzina, gropa e zezë është qeveria, është Edi Rama që po shkatërron gjithçka”,- tha një greviste, ndërsa një tjetër vuri në dukje mungesën e interesimit nga Ministria e Energjetikës.
“Ministrja Belinda Balluku është femër. Le të na japë përgjigje negative. Do ta përtypim. Por vetëm të vijë”,- tha një greviste.
“Jemi gra të shkolluara. Nuk e kam menduar asnjëherë veten në grevë, por gjendja ekonomike na solli këtu. Jemi pa bukë. Kemi lënë familjen. Jemi në borxhe dhe kredi deri në fyt. Jemi detyruar të hymë në grevë për pagat e prapambetura, të cilat nuk i kemi marrë prej dy vjetësh”,- tha një tjetër greviste.
“Juve nuk jua mban pagën një biznes, por jua mban pagën qeveria dhe Edi Rama, sepse asnjë biznes nuk guxon të mbaje pagën e punëtorëve, nëse nuk ka mbështetjen e qeverisë”- u shpreh Dhurata Çupi.
Ndërsa Orjola Pampuri, tha se, Rama nuk e shikon realitetin këtu sepse ai po bën shown e radhës.
Por vajtja e përfaqësuesve të PD-së dhe LSI-së nëpër greva të tilla apo protesta gjithmonë ka shërbyer si një faktor kompromentimi i kauzave të drejta të qytetarëve.
Sa herë që në protestat qytetare anti-qeveritare për kauza të ndryshme, si ajo e Unazës së Re në Tiranë, e Teatrit Kombëtar, e protestave të studentëve, të naftëtarëve, të fermerëve, apo edhe të tjera, kanë hyrë elementët politikë të opozitës, kauzat janë shuar dhe përçarë.
Janë të shumtë njerëzit që mendojnë se PD-ja dhe LSI-ja, në vend që të jenë mbështetëse dhe nxitëse të revoltave dhe protestave duke e detyruar qeverinë për reflektim, ato janë thjesht “zjarrfikëse” të kryeministri Rama.
Vendimi për të hyrë në grevë i grave të Uzinës së Ballshit erdhi 18 ditë pas përkeqësimit të gjendjes shëndetësore të grevistëve burra.
/GazetaReforma.com/
