Opozitës po i kërkohet të ndërpresë luftën politike në emër të pandemisë Covid-19. Mesazhi është përçuar nga parlamenti përmes ministres së Shëndetësisë, Ogerta Manastirliu. Duke folur për vendosjen e maskave, ministrja deklaroi beteja nuk do të jetë lehtë. Në drejtim të kryetarit të PD-së, Lulzim Basha, ajo bëri ftesën për bashkëpunim, dhe heqje dorë nga kërkesat që i hapin punë qeverisë, që kanë të bëjnë me fondet e shëndetësisë apo ato sociale.
“Vendosja e maskave jashtë shtëpisë është një hap drejt reduktimit të infeksioneve të virusit. Maska, higjiena dhe distanca janë tre masa për të fituar betejën, që nuk do të jetë e lehtë. Kush nuk do të shohë qartë, mund ta përdorë këtë situatë për të bërë politikë. Edhe ata që janë jashtë parlamentit vijojnë të flasim për plane e pika, por unë besoj se është situatë serioze, duhet ta trajtojmë të tillë dhe duhet të jemi të gjithë bashkë, pasi është një virus që kërcënon jetën e shqiptarëve. Duhet të jemi bashkë, ta shohim me racionalitet situatën. Kjo nuk është një luftë e qeverisë, por e të gjithë qytetarëve shqiptarë, të cilët duhet të vijojnë zbatimin e këtyre rregullave, që do të shmangim të gjithë ato pasoja që mund të kishte një mbyllje. Shpresoj fort që maska të vijojë të zbatohet edhe në ditët e ardhshme, pasi ne do të shohim se si do ta menaxhojmë”, deklaroi Manastirliu.
Ndërkaq, i bezdisur nga pyetja e gazetarëve, Rama disa ditë më parë tha se nuk kishte dijeni çfarë ishte plani me 5 pika i Bashës.
Në të njëjtën kohë, në bashkëbisedimin me gazetarët, ku sërish i kërkoi kryeministrit Edi Rama të zbatojë planin me 5 pika për rimëkëmbje nga kriza, Basha tha se kreu i qeverisë gënjen kur thotë se nuk e njeh këtë plan. Ai i etiketoi si monstra qeveritarët, ndërsa qytetarëve iu këshilloi të mbajnë maska, të ruajnë higjienën, pasi askush nuk po mendon për ta.
“Gënjen si derr, siç e shikoni kur është puna për karagjozllëqe, se kështu e ka shtyrë për 22 vjet, rri me laps në dorë, e merret me lapsuset e mia. Nuk është e vërtetë që se nuk e ka dëgjuar planin.” tha Basha.
Ndër të tjera ky plan propozon: Përgatitja për një shpërthim tjetër të infeksionit të COVID-19, duke rritur numrin e testimeve për COVID-19 në 2500 testime në ditë; Rimbursim i plotë për marrjen e mjekimit ambulator kundër COVID-19; Sigurimin e pajisjeve mbrojtëse për të gjithë personelin shëndetësor dhe rritjen e kapaciteteve spitalore; Bonus 1000 Euro për çdo mjek dhe 500 euro për çdo infermier për 6 muajt e ardhshëm. Gjithashtu propozohet dyfishimi i ndihmës ekonomike për çdo familje që trajtohet me ndihmë ekonomike. Çdo pensionist të përfitojë një çek mujor prej 2 mijë lekë të rinj në muaj për përballimin e kostove shtesë të pandemisë, për 6 muaj.
/GazetaReforma.com/
