Koronavirusi është kthyer në një “minierë ari” për një pjesë, sidomos për industrinë farmaceutike e cila në këto muaj të “zinj” për ekonominë globale, po siguron fitime të majme.
Shumica e shteteve janë angazhuar në blerjen pa fund të medikamenteve dhe mjeteve profilaktike mbrojtëse ose testuese, duke bërë që industria farmaceutike të jenë të kulmin e saj.
Këtë gjë ka bërë edhe Instituti i Shëndetit Publik, i cili ka nisur nga realizimi dhe porositja e tenderave me vlera kolosale.
ISHP-ja do të blejë këtë herë plot 138,240 kite për kryerjen e testimeve të Covid-19. Fondi për prokurimin e kiteve për testet Covid-19, tamponë dhe materialeve të tjera është në vlerën e 1,3 mln eurove.
Afati i dorëzimit të ofertave është deri në 6 nëntor. Kohëzgjatja e kontratës të prokurimit është për 12 muaj.
“Kiti duhet të jetë i standardizuar për të kryer të paktën 192 teste me një volum mostre prej 200 µl/test. Kiti duhet të përmbajë: kartrixhe (shërben për përgatitjen e mostrës) për të gjithë reagentët e nevojshëm së bashku me kapakët respektive, stativ për enzimën, tampon AVE 1 (të paktën 20ml), tampon AVE 2 (të paktën 2 ml), ARN carrie, si dhe instruksionet e nevojshme për përdorim dhe çdo reagent tjetër të nevojshme për të zhvilluar reaksionin”,- thuhet në dokumentet teknike të tenderit.
Kontrata e prokurimit do të jetë Marrëveshje Kuadër dhe do të lidhet vetëm me një operator ekonomik, pasi siç shpjegohet në dokumentet e tenderit lëvrimi nga operatorë të ndryshëm nuk do të ishte i favorshëm, pasi do të sillte kosto shtesë dhe vonesa në furnizimi.
“Duke qenë se Shqipëria është një treg i vogël dhe mallrat objekt i Marrëveshjes Kuadër (MK) janë mallra importi dhe tregu i jashtëm për këta artikuj është shumë dinamik për shkak të pandemisë globale të Covid-19, nxjerrja vetëm e një Operatori Ekonomik fitues do të garantonte sigurinë e furnizimeve.
Pasiguria dhe vonesat mund të sjellë dështime në furnizimin me këto materiale, si rrjedhojë sjell bllokimin e punës në Sektorin e Survejancës Laboratorike të Sëmundjeve Emergjente Virale në ISHP për testimin e Covid-19”.
Aktualisht Shqipëria bën më pak se 1,000 testime në ditë, duke e renditur atë ndër vendet me numrin më të ulët të testimeve në raport me popullsinë.
Një nga strategjitë e rekomanduara nga Organizata Botërore e Shëndetësisë ka qenë kryerja e sa më shumë testimeve, si një mjet për të gjurmuar koronavirusit, në mënyrë që të kufizohet përhapja e tij.
Ky është tenderi i dytë që ISHP zhvillon brenda një afati të shkurtër. Në fund të muajit gusht u zhvillua prokurimi për blerjen e kiteve dhe tamponëve për testet e Covid-19 me vlerë 400 mijë euro.
/Burimi: Monitor.al/GazetaReforma.com/
