Nuk ka kthim mbrapa për studentët, ata do ta vazhdojnë protestën. Ky është një vendim që studentët e Fakultetit të Drejtësisë të Universitetit të Tiranës tashmë e kanë marrë dhe nuk do të tërhiqen deri në plotësimin e të tetë kërkesave.
Për TvKlan ata janë shprehur se kanë përpos mbështetjes së marrë deri tani edhe mbështetjen e pedagogëve, ndaj bojkotimin do ta vazhdojnë edhe gjatë kësaj jave që vjen.
Situatë krejt tjetër paraqitet në Fakultetin e Tiranës, ku ka pasur një ndërprerje të ngujimit, mirëpo rikthimi sipas studentëve do të jetë ditën e nesërme. Ngujimi ka nisur nga këta studentë dhe duke iu dhënë zemër edhe studentëve të tjerë kanë arritur që ngujimi të marrë përmasat që ka sot.
Shumë më ndryshe duket situata në Fakultetin e Histori-Filologjisë, ku studentëve do iu bashkohen edhe pedagogët, të vendosur për të arritur plotësimin e tetë kërkesave që ata kanë. Përpos protestës, ata kanë lajmëruar edhe një grevë 1 ditore dhe këtë vendim e kanë marrë gjatë mbledhjes së Asamblesë ditën e premte. Tashmë ky është fakt dhe për më tepër pedagogët janë të vendosur të kërkojnë me forcë nga qeveria anulimin e ligjit për Arsimin e Lartë.
Situata në të cilën është sot arsimi i lartë shqiptar duket se do të vazhdojë ende dhe asnjë nga palët, si studentët ashtu edhe qeveria, nuk ka ndërmend të lëshojë pe, pa fituar të drejtat që kanë.
