Bashkëshortja e 71-vjeçarit Lefter Zhidru, i cili u ekzekutua nga fotrxat speciale RENEA, Floresha Zhidru, ka shpjeguar se si kishte nisur prej vitesh konflikti i familjes dhe burrit të saj me fqinjët me të cilët kishin edhe një proces gjyqësor.
Gjatë një interviste në emisionin “Pa Gjurmë”, ajo ka rrëfyer se gjithçka ka nisur 6 vite më parë dhe shkak u bë makina e tij.
“Komshinjtë i paditëm ne disa herë. Për shpifje. Kishim 6 vite konflikt. Debatet rrodhën nga një makinë. Konflikti ka nisur që herët sepse makina jonë parkohet poshtë pallatit.
Mblidheshin gjithmonë disa çuna dhe hipnin sipër kofanos. Burri doli në dritare dhe u foli për tu larguar. Kjo ka ndodhur në 30 maj të 2014. Ky ishte vetëm fillimi.
Pas kësaj burri (Lefter Zhidru) u flet dhe u thot çunave që të largohen. U fërshëllen. Njëri prej çunave i thot dil nga dera mos më fërshëlle dhe aty filluan të kapeshin. Kemi bërë denoncim në polici për këtë rast. Prej 12 vitesh ne jetonim aty. Ndërsa që prej 6 vitesh kemi pasur konflikte me banorët. Ishte e pamundur për ne që të largoheshim prej aty. Lefteri thoshte pse të më largojnë? Ai nuk donte të ikte nga banesa si i frikësuar, nuk ulej.
Ai i ka pasur këto tensione nga gjyqet, padrejtësitë, erdhi i tensionuar nga rruga. Ai ka kërkuar vetëm drejësinë, nuk ka thënë kurrë që do merrnte hak. Edhe sot vetëm zvarritje ka dhe nuk u dha e drejta, ne nuk kemi kërcënuar askënd. Gjatë muajve të karantinës fqinjët na e kanë nxirë.
Policia edhe pse ne bënim denoncime nuk mori masa kundër fqinjëve. Shkaku nisi pse u prek makina dhe më pas u shoqëruan në kohë me grindje dhe sharje e ofendime”, ka thënë gruaja e 71-vjeçarit që u ekzekutua nga RENEA, Floresha Zhidru.
Gruaja e të ndjerit, ka rrëfyer gjithashtu se ajo nuk kishte pasur kurrë dijeni për armët dhe nuk e dinte se nga kishin dalë. Ajo është shprehur se bashkëshorti i saj Lefteri, shkonte një herë në 5 ditë ose një herë në javë për të bërë furnizime në Tiranë, pasi merrte atje materiale gomisterie, por kurrë nuk kishte parë armë zjarri as në shtëpi dhe as në dorën e tij.
“Absolutisht nuk kemi ditur asgjë, im shoq ka pasur materialet e veta në një dhomë. Burri im ka qenë tepër i fyer nga shteti se nuk lanë gjë pa i bërë dhe arriti deri këtu. Materialet e punës i sistemoi në një dhomë dhe ne nuk e dinim se çfarë kishte aty. Lefteri merrej me makinat bujqësore. Ne pastronim dhomën po gjithçka shihnim ishin hekura, gjëra të rënda, jo armë. Ishim mjete të rënda”, është shprehur Floresha Zhidru gjatë intervistës së saj në emisionin “Pa Gjurmë”.
