Policia e Tiranës ka arrestuar ditën e sotme shtetasi Afrim Kurti 18 vjeç, ndërsa ka shpallur në kërkim kushëririn e tij Dëfrim Kurtin.
Mësohet se të dy këta shtetas, i merrnin para një vajze duke e shantazhuar se do i publikonin videot intime.
Vajza, e cila për arsye sigurie i ruhet anonimati, ka shkuar në Polici dhe ka bërë kallëzim për dy kushërinjtë Kurti.
Bëhet me dije se një prej kushërinjve, Dëfrimi, ishte i lidhur me vajzën dhe i kishte marrë asaj telefonin.
Me ndihmën e të resë, efektivët e Policisë së Tiranës u kanë ngritur kurth dy kushërinjve dhe kanë lënë një vendtakim për t’i dhënë sasinë e parave.
I pari që ka mbërritur për të marrë paratë ka qenë Afrim Kurti. Në momentin që ai ka mbërritur, efektivët e policisë e kanë prangosur, ndërsa në kërkim është shpallur kushëriri i tij Dëfrimi.
Por Dëfrim Kurti nuk është një emër i panjohur për policinë e Tiranës. Në vitin 2019 ai është arrestuar pasi akuzohej se kishte vrarë shoferin Arben Gjeci, sepse ky i fundit kishte lidhje me bashkëshorten e Kurtit, Elida Canin. Por më vonë, u zbulua se vrasjen e kishte kryer vëllai i Elidës, kunati i Dëfrimit, për të vënë në vend nderin e familjes.
Njoftimi i Policisë:
Nga Sektori për Hetimin e Krimeve të Rënda ndaj Jetës dhe Pronës u bë arrestimi në flagrancë i shtetasit me iniciale A. K., 18 vjeç, si dhe u referuan materialet në Prokurorinë pranë Gjykatës së Shkallës Parë Tiranë, për shtetasin në kërkim me iniciale D. K, 30 vjeç, pasi në bashkëpunim kanë shtrënguar me anë të kanosjes dhe dhunës për dhënie pasurie, një shtetase, me qëllim t’i përvetësonin shumën prej 15.000 lekësh të reja, për mospublikimin e fotove të saja në rrjetet sociale.
