Kryenin martesa mes të rinjve për t’i çuar luftëtarë për ISIS, ja kush është Lubjana Gjeçaj pjesë e grupit terrorist

Policia e shtetit në bashkëpunim me atë italiane ka arrestuar ditën e sotme  43-vjeçaren Lubjana Gjecaj e akuzuar për terrorizëm dhe e shpallur në kërkim ndërkombëtar.

Dosja.al ka mësuar se Gjecaj pjesë e hetimeve se bashku me 5 shqiptarë të tjerë, akuzohej se është pjesë e një rrjeti rekrutimi të xhihadistëve nga Itali për në Siri. Më  07 maj të vitit 2018, ajo u dënua me 3 vjet burg.

Lubjana Gjecaj është e ëma e Aldo Kobuzit, shqiptarit që u martua me një italiane për ta kthyer atë në italianen e parë xhihadiste në vendin fqinj.

Djali i saj, Aldo Kobuzi aktualisht ndodhet në Siri dhe lufton krah ISIS së bashku me gruan e tij me italiane, e cila është konvertuar në myslimane. Maria Giulia Sergio ose ndryshe “Fatima”, gjithashtu u nis për të luftuar në Siri bashkë me bashkëshortin, megjithatë ende nuk dihet fati i tyre.

Ky grup i strukturuar kriminal terrorist, kryente martesa mes të rinjve dhe i dërgonte ata në Turqi, dhe më pas në Siri për të luftuar për të ashtuquajturin Shteti Islamik.

Një krushqi e lidhur në vitin 2014 mes familjes së një vajze të re italiane (Maria Giulia) dhe një shqiptari me origjinë nga Laçi (Aldo Kobuzi) u shndërrua në një celulë terroriste brenda Italisë që rekrutonte luftëtarë për ISIS-in. Hetimet për grupin kanë nisur në vitin 2014, ku Policia italiane së bashku me atë shqiptare prangosën 10 persona (4 italianë, 5 shqiptarë dhe 1 kanadez) për pëfshirje në organizatë. Shqiptarët u identifikuan si: Baki Çoku, Dritan Gjeçaj, Aldo Kobuzi, Arta Kakabuni, dhe Lubjana Gjeçaj.