Ditën e sotme Komisioni i Jashtëm i Vlerësimit në policinë e shtetit ka konfirmuar në detyrë numrin dy të policisë së shtetit Gjovalin Loka.
Drejtori i Sigurisë Publike në Policinë e Shtetit, Gjovalin Loka, ka kaluar me sukses Vetingun pasi gjatë seancës dëgjimore në KPK, ai ka rezultuar i pastër në të tri shtyllat e Vetingut, në deklarimet e pasurisë, pastërtinë e figurës dhe aftësitë profesionale.
Por duket se diçka e tillë ka ngjallur pakënaqësi te ish-drejtuesi i Lartë i Policisë së Shtetit Mit’hat Havari, i cili me anë të një statusi në Facebook ka thënë se në rradhët e policisë ende sundojnë paaftësia dhe sigurimi i shteit.
“Vettingu në Policinë e Shtetit është një farsë, blof. Paaftësia dhe sigurimi i shtetit sundojnë ende,”– shkruan Havari.
Ndërkohë kujtojmë se përgjatë hetimit për efekt të vettingut komisioni i jashtëm në gjetjet e tij bëri publik faktin se Loka përgjatë janar 1991 deri më qershor 1991 kishte qenë punonjës i sigurimit të shtetit në rolin e operativit në Bicaj të Kukësit.Por për këtë Loka kishte shkruar se komisioni nuk duhet ta diskriminojë pasi përgjatë muajve si operativ ai nuk kishte kryer asnjë veprim në dëm të shtetasve, asnjë rekrutim, asnjë keqtrajtim por vetëm kishte marrë në dorëzim dosjet nga ish eprori i tij.
