Gjatë një operacioni të kryer në Prishtinë një ditë më parë nga Policia e Kosovës, Sektori Qendror për Hetimin e Trafikimit me Qenie Njerëzore dhe Drejtoria për Migrim dhe të Huaj, të mbështetur nga zyrtarë të Qendrës për Punë Sociale në Prishtinë është zbuluar trafikimi i qenieve njerëzore.
Në njoftimin e policisë së Kosovës thuhet se me urdhër të gjykatës janë kontrolluar dy shtëpi në Prishtinë, pasi sipas informacioneve që policia kishte marrë, aty qëndronin disa shtetas të huaj, të cilët mund të ishin viktima potenciale të trafikimit të qenieve njerëzore.
Policia gjatë kontrollit mësoi se 26 persona janë me nënshtetësi shqiptare, dhe arrestoi vetëm një person si i dyshuar për përfshirje në veprën penale ‘bashkësia jashtëmartesore me personin nën moshën.’
“Policia, në ato dy lokacione ka hasur në 26 persona, prej tyre 13 fëmijë, të cilët ishin kryesisht në lidhje familjare dhe vinin nga Shqipëria.”- thuhet në njoftim.
Njoftimi i policisë Kosovë
KOMUNIKATË PËR MEDIA
Arrestohet një i dyshuar për përfshirje në veprën penale ‘bashkësia jashtëmartesore me personin nën moshën
gjashtëmbëdhjetë vjet’
Prishtinë, 19 gusht 2020
Policia e Kosovës, gjegjësisht: Sektori Qendror për Hetimin e Trafikimit me Qenie Njerëzore dhe Drejtoria për Migrim dhe të Huaj, të përkrahur nga zyrtarë të Qendrës për Punë Sociale-Prishtinë, më 18.08.2020, me urdhër të gjykatës kanë kontrolluar dy lokacioneve (shtëpi) në Prishtinë, me qëllim të verifikimit të informacioneve se në ato shtëpi qëndrojnë disa shtetas të huaj, të cilët mund të ishin viktima potenciale të trafikimit me qenie njerëzore. Policia, në ato dy lokacione ka hasur në 26 (njëzet e gjashtë) persona, prej tyre 13 fëmijë, të cilët ishin kryesisht në lidhje familjare dhe vinin nga Shqipëria.
Në mesin e këtyre personave është hasur edhe i dyshuari M.S. (viti i lindje 1999) shtetas i Shqipërisë, i cili ishte duke bashkëjetuar me një shtetase të Greqisë të moshës 13 vjeçare. Policia në konsultim me prokuroren e rastit ka iniciuar veprën penale ‘bashkësia jashtëmartesore me personin nën moshën gjashtëmbëdhjetë vjet’. I dyshuari është ndaluar për 48 orë, ndërsa viktimës i është ofruar strehim dhe trajtim sipas Proceduarve Standarde Vepruese të Drejtorisë për Hetimin e Trafikimit me Qenie Njerëzore. Po ashtu, përmes ILEC-ut është njoftuar zyra greke në Prishtinë për shtetasen e tyre.
Kurse, 24 (njëzet e katër) persona të tjerë të hasur në ato dy lokacione, janë trajtuar nga zyrtarë policorë të Drejtorisë për Migrim dhe të Huaj. Të njëjtit, përmes PKK Vërmicë, janë kthyer në Shqipëri.
