GJIROKASTËR
Gjykata e Gjirokastrës ka dhënë masën e sigurisë për shoferin e ambulancës në Kakavijë Admir Golemi, që përplasi për vdekje një fëmijë 10 vjeç.
Gjykata vendosi ta lërë në burg Golemin, pasi shtypi për vdekje të miturin Samuel Ndoji, afër kufirit me Greqinë.
Gjatë seancës gjyqësore në Gjirokastër, Golemi tha se ishte duke ecur me shpejtësi pasi në ambulancë kishte njerëz të sëmurë. Ai ka shtuar se fëmija i ka ndërprerë rrugën.
“Po nxitoja për të çuar në spital të sëmurin, fëmija më preu rrugën. Më doli furishëm nga krahu i majtë i rrugës. Isha duke ecur me 75 km/orë”, deklaroi ai përpara gjyqtarëve.
Avokati i Admir Golemit u shpreh se klienti i tij ka ecur me një shpejtësi krejt normale dhe të lejuar. Pasi dëgjoi palët, gjykata vendosi ta lërë në burg shoferin e ambulancës.
Më datë 15 gusht, teksa priste në radhë në kufi, ambulanca përplasi për vdekje 10-vjeçarin Samuel Ndoji. Përplasja ishte fatale për fëmijën, që ka ndërruar jetë në vend.
Dëshmitarë nga vendi i ngjarjes kanë thënë se fëmija ishte ulur në një pemë e po priste në radhë në Kakavijë e se në ambulancë nuk kishte asnjë të sëmurë.
Kjo ngjarje ishte shokuese edhe për opinionin publik dhe u komentua shumë. Për të voglin nga Lezha, një status prekës bëri mësuesja e tij.
Ndërsa, kryeministri Edi Rama vendosi që t’ju japë familjes Ndoji 5 milionë lekë të vjetra për të lehtësuar dhimbjen në këtë tragjedi.
