TIRANË
Operacioni Forca e Ligjit vazhdon në mënyrë permanente, ndërsa gjatë ditës së sotme iu janë dërguar formularë për deklarim të pasurisë 5 shtetasve.
Ata janë 4 persona nga Elbasani dhe njëri nga Berati. Personat që duhet të deklarojnë pasurinë për 48 orë, janë dënuar për vrasje, trafik droge dhe pastrim parash.
Shtetasit në fjalë duhet që të plotësojnë formularin, ndërsa më pas është SPAK që vendos nëse pasuria e tyre është vendosur në mënyrë të ligjshme apo në mënyrë kriminale.
Njoftimi i OFL-së:
Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020 iu ka dërguar formularët për deklarimin e pasurisë 5 të dënuarve për krime të rënda, 4 nga Elbasani dhe 1 nga Berati.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
– Elis Bahushi,, banues në Elbasan, i dënuar për veprat penale “Prodhimi dhe shitja e narkotikëve” dhe “Pastrimi i produkteve të veprës penale”;
– Edmond Stafa, banues në Elbasan, i dënuar për veprën penale “Trafikimi i narkotikëve”;
– Met Bozi, banues në Elbasan, i dënuar për veprën penale “Vrasja në rrethana të tjera cilësuese”;
– Bledi Çepa, banues në Elbasan, i dënuar për veprën penale “Prodhimi dhe shitja e narkotikëve”;
– Armand Gavelli, banues në Berat, i dënuar për veprën penale “Trafikimi i narkotikëve”, kryer në bashkëpunim.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
