TIRANË
Një ngjarje e rëndë u shënua në orët e para të mëngjesit të sotëm në Tiranë, ku një i ri ka humbur jetën në spitalin “Shefqet Ndroqi” në kryeqytet, pasi dyshohet se ishte i prekur me Covid-19.
Paraprakisht bëhet me dije se i riu ishte në kushte të rënduara psikologjike, kur ka kryer edhe aktin ekstrem. Ai është vetëhedhur nga kati i tretë i spitalit.
Burimet për “News 24” bënë me dije se djali do të qëndronte edhe disa ditë në spital e më pas do të linte ambjentet e “Shefqet Ndroqit”.
“Vetëvrasja e të riut ka qenë tragjike. Ai trajtohej me shumë pak oksigjen, 3-4 litra, pra në minimunimin e mundshëm të oksigjenimit të pacientëve. Ishte një pacient që po dilte nga spitali dhe ende nuk dimë arsyet e vërteta se pse ky 29-vjeçar i cili nuk kishte komplikacione të tjera është shtyrë drejt vetëvrasjes.
Pacienti ka qenë duke marrë mjekimin në momentin kur ka ndodhur ngjarja. I është bërë një injeksion dhe do të merrte sasinë e serumit”, thanë burimet.
Policia njoftoi me anë të një deklarate se i riu me inicialet XH.K. është vetëhedhur nga kati i 3 i spitalit duke gjetur vdekjen. Ai kishte 7 ditë që ishte shtruar në spital.
