Policia e Durrësit lajmëron se ka arrestuar dy persona në Durrës, pasi kanë qëlluar me armë zjarri në ajër.
Të arrestuarit kanë qëlluar me armë, në kohën që ishin duke udhëtuar me automjetin e tyre.
Ngjarja ka ndodhur në lagjen numër 15 të qytetit bregdetar.
Bëhet me dije se në pranga kanë përfunduar shtetasit me inicialet D.M., 34 vjeç dhe K.M., 49 vjeç, banues në Durrës. Makina u sekuestrua në cilësinë e provës materiale.
“Specialistët për Hetimin e Krimeve në Komisariatin e Policisë Durrës, pas një pune hetimore të mirorganizuar dhe profesionale, brenda pak orëve kanë bërë të mundur zbardhjen dhe dokumentimin e një ngjarjeje të ndodhur në lagjen nr. 15 Durrës, ku dy shtetas qëlluan në ajër me armë zjarri.
Në sajë të veprimeve hetimore të menjëhershme kanë identifikuar dhe arrestuar autorët e dyshuar, shtetasit D. M., 34 vjeç dhe K. M., 49 vjeç, banues në Durrës, për veprat penale “Armëmbajtja pa leje” dhe “Prishja e qetësisë publike”.
Këta dy shtetas dyshohet se kanë qëlluar në ajër me një armë zjarri pistoletë, gjatë kohës që kanë qenë duke udhëtuar së bashku me një mjet tip “Audi”, i cili është sekuestruar si provë materiale”.
Materialet i kaluan Prokurorisë së Rrethit Gjyqësor Durrës, për veprime të mëtejshme”, thuhet në njoftimin e policisë.
