Organizata Botërore e Shëndetësisë ditën e sotme tha se mund të mos ketë kurrë një vaksinë efektive për COVID-19, dhe se rruga drejt normalitetit do të jetë e gjatë. Më shumë se 18 milionë njerëz në mbarë botën raportohet se janë infektuar me COVID-19, dhe 688.080 kanë vdekur.
Drejtori i Përgjithshëm i OBSH-së, Tedros Adhanom Ghebreyesus dhe kreu i urgjencave të OBSH-së, Mike Ryan, në një konferencë për shtyp nxitën kombet që të zbatojnë me rigorozitet masat shëndetësore siç janë: mbajtja e maskës, distanca fizike, larja e duarve dhe testimi, pasi deri më tani vetëm kjo është mënyra e vetme për të parandaluar përhapjen e COVID-19.
“Mesazhi për njerëzit dhe qeveritë është i qartë: Bëjini të gjitha,. Një numër vaksinash momentalisht ndodhen në fazën e 3 të studimeve klinike dhe të gjithë shpresojmë të kemi një numër vaksinash efektive që mund të ndihmojnë në parandalimin e infektimit. Sidoqoftë, nuk ka asnjë plumb argjendi për momentin, dhe nuk mund të ketë kurrë. Tani për tani, ndalimi i përhapjes zbret në bazat e shëndetit publik dhe kontrollit të sëmundjeve. Testimi, izolimi dhe trajtimi i pacientëve, dhe gjurmimi dhe karantinimi i kontakteve të tyre. Bëjini të gjitha. Informoni, fuqizoni dhe dëgjoni komunitetet. Dhe kur duket sikur është nën kontroll, vazhdoni! Vazhdoni të forconi sistemin shëndetësor. Vazhdoni të përmirësoni mbikëqyrjen, gjurmimin e kontakteve dhe të siguroni që shërbimet shëndetësore të ndërprera të rifillojnë sa më shpejt që të jetë e mundur…,” deklaroi kreu i OBSH.
Kjo deklaratë e krerëve të OBSH-së vjen vetëm pak ditë pasi u paralajmërua se pandemia me shumë gjasë do të ishte e gjatë. Një numër vaksinash po testohen rreth botës në përpjekjen për të gjetur antidotin ndaj virusit vrasës.
