Në kuadër të operacionit “Perimetri”, kanë rënë në prangat e policisë së Korçës 4 persona.Ky operacion kishte nisur prej kohësh nga policia, për goditjen e trafikut të paligjshëm të emigrantëve. Personat e arrestuar janë kapur gjatë kohës që po transportonin emigrantë të paligjshëm nga Devolli në drejtim të Tiranës.
Shtetasit me iniciale M.L., Ç.B. dhe F.Q., ndodheshin brenda një mjeti tip “BMW”. Ndërsa i arrestuari tjetër shtetasi me iniciale M.Ç., po drejtonte një makinë tip “Audi”, brenda të cilës ndodheshin edhe emigrantët. Ky i fundit nuk iu bind urdhërit të policisë për të ndaluar dhe në përpjekje për t’u arratisur u përplas me një furgon.
Sipas policisë këta shtetas me në krye F.Ç iu merrnin emigrantëve 300 euro, për t’i kaluar drejt vendeve të BE.Materialet i kaluan Prokurorisë të Rrethit Gjyqësor Pogradec për veprat penale “Ndihma për kalim të paligjshëm të kufijve, kryer në bashkëpunim” dhe “Mosbindja ndaj urdhrit të punonjësit të policisë së rendit publik”.
Njoftimi i policisë
Qarku Korçë
Vijon operacioni policor i koduar “Perimetri”.
Në vijim të këtij operacioni, goditet një tjetër rast i veprimtarisë kriminale në fushën e dhënies ndihmë shtetasve të huaj për kalim të paligjshëm të kufirit, kundrejt fitimit.
Transportonin 7 emigrantë të paligjshëm, vihen në pranga 4 shtetas, njëri prej të cilëve gjatë ndjekjes nga policia nuk iu bind urdhrit të punonjësve për të ndaluar.
Strukturat për Hetimin e Krimeve në Drejtorinë Vendore të Policisë Korçë, në bashkëpunim me Policinë Kufitare, shërbimet e FRONTEX-it, Policinë Rrugore dhe Komisariatin e Policisë Pogradec, në vijim të operacionit policor “Perimetri”, goditën një tjetër rast të veprimtarisë kriminale në fushën e dhënies ndihmë shtetasve të huaj, për kalim të paligjshëm të kufirit, kundrejt fitimit, me qëllim dërgimin e tyre drejt vendeve të BE-së. Si rezultat i të cilit u bë kapja dhe arrestimi në flagrancë i shtetasve:
• M.Ç., 19 vjeç;
• Ç. B., 25 vjeç;
• M. L., 22 vjeç dhe
• F. Q., 27 vjeç, banues në Durrës.
Shërbimet e Policisë, nga informacione të siguruara në rrugë policore se dy mjete po transportonin emigrantë të paligjshëm nga Devolli në drejtim të Tiranës, organizuan punën, lokalizuan dhe konstatuan mjetin tip “BMW”, me drejtues shtetasin M. L., brenda të cilit ndodheshin edhe shtetasit Ç. B., dhe F. Q., si dhe mjetin tip “Audi” me drejtues shtetasin M.Ç., brenda të cilit ndodheshin 7 emigrantë të paligjshëm, të cilit i kanë bërë me shenjë të ndalonte por ky i fundit nuk iu bind urdhrit të punonjësve të policisë dhe është larguar me shpejtësi, ku në fshatin Blacë, Pogradec, është përplasur me një mjet tip furgon duke shkaktuar dëme materiale.
Nga hetimet e kryera rezulton se shtetasi F. Q., duke qenë në rolin e organizatorit të këtij aktiviteti kriminal, në bashkëpunim me 3 shtetasit e tjerë, kundrejt fitimit prej 300 euro për person, iu kishin premtuar emigrantëve të paligjshëm, kalimin e tyre drejt vendeve të BE-së.
Materialet i kaluan Prokurorisë të Rrethit Gjyqësor Pogradec për veprat penale “Ndihma për kalim të paligjshëm të kufijve, kryer në bashkëpunim” dhe “Mosbindja ndaj urdhrit të punonjësit të policisë së rendit publik”.
