Qendra Evropiane për Parandalimin dhe Kontrollin e Sëmundjeve ka përditësuar ditën e djeshme të dhënat rekomanduese për hapjen e kufijve ku bie në sy prirja në rritje e rasteve ditore.
Referuar numrit të të infektuarve, mesatarja e 14 ditëve të fundit në 27 vendet anëtare të Bashkimit Evropian ka qenë 16 të infektuar për çdo 100 mijë banorë krahasuar me dy javë më parë, më 15 korrik, kjo mesatare ishte 13 të infektuar/100 mijë banorë.
Kjo mesatare është rritur ndjeshëm për vendet e Ballkanit nga 73 raste në 85 dy javët e fundit. Prirja rritëse më shqetësuese është ajo në Mal të Zi nga 123 raste për çdo 100 mijë banorë në 162 raste.
- Shqipëria 44 (+5)/100 mijë banorë
- Serbia 77 (+14)/100 mijë banorë
- Bosnje e Hercegovina 96 (+24)/100 mijë banorë
- Maqedoni e Veriut 100 (+6)/100 mijë banorë
- Kosova 132 (+8)/100 mijë banorë
- Mali i Zi 162 (+39)/100 mijë banorë
Në bazë të kësaj mesatareje BE-ja do të vazhdojë t’i mbajë mbyllur kufijtë për vendet nga Ballkani Perëndimor.
Ndërkohë Brukseli ka rekomanduar që hapja e kufijve të bëhet sipas një rregulli ku nëse vendet do të raportojnë një mesatare më të ulët se ajo e BE-së në 14 ditët e fundit mund të këshillohet hapja e kufijve.
Për sa i përket vendeve në BE, Luksemburgu është ai që raporton mesataren më të lartë për çdo 100 mijë banorë (206 raste) ndërsa Malta e Estonia kanë mesataren më të ulët 1 rast.
Burimi/Euronews.al
