Presidenti Ilir Meta ka vijuar sot me konferencën e tij javore me gazetarët. Meta komentoi dy prej vendimeve që u morën dje në Kuvend dhe përshëndeti miratimin e dekretit të tij për betimin e gjyqtarëve të anëtarëve të Gjykatës Kushtetuese.
Më tej presidenti Meta e quajti antikushtetues vendimin për ndryshimin e betimit te gjyqtarëve, pasi sipas tij duhet të bëhej para presidentit. Gjithashtu Meta deklaroi se Kuvendi përmes këtij ligji, i ka hequr kompetencën presidentit për të pranuar betimin e Gjyqtarit të Gjykatës së Lartë dhe Prokurorit të SPAK.
Sipas Metës ky përmes këtij ndryshim të ligjit cënohet integriteti i Gjykatës së Lartë.
“Dje Kuvendi miratoi dekretin e presidentit për kthimin për rishqyrtim, për Gjykatën Kushtetuese. Ky është ai dekret që pata kënaqësi që ta nënshkruaja, para manifestimit në bulevardin Dëshmorët e Kombit në 2 mars. Pranimi i këtij dekreti, provon qartë se maxhoranca u detyrua që të pranojë fuqinë e popullit. Përshëndes Komisionin e Venecias, që me raportin e saj i dha të drejtë Presidentit. Betimi i gjyqtarit do të duhet të bëhet para Presidentit të Republikës. Veprimi për të ndryshuar procedurën, ishte antikushtetues. Në të njëjtën ditë, ku vëmendja ishte e përqendruar tek një çështje zhurmëmadhe, Kuvendi u soll krejt ndryshe me ligjin tjetër, për disa shtesa për statusin e Gjyqtarëve dhe prokurorëve. Përmes këtij ligji, Kuvendi preku në mënyrë të njëanshme, ligjet e reformës në drejtësi dhe veproi krejt ndryshe. Përmes këtij ligji, Kuvendi i hoqi të drejtën Presidentit. Ky kuvend i ndau gjyqtarët në 3 kategori. Përmes këtij ndryshimi të ligjit, shkelet integriteti i Gjykatës së Lartë. Gjykata e Lartë është kompetente për zgjedhjen e Gjykatës Kushtetuese. Si ngritja e gjykatës së lartë, dhe asaj Kushtetuese, janë dy nga kushtet e BE dhe Bundestagut.”, tha Meta.
